FH og KR hafa átt fast sæti í Evrópukeppni undanfarin ár.
Gestir vikunnar í sjónvarpsþætti Fótbolta.net. Kristinn Kjærnested, Sæmundur Friðjónsson og Jón Rúnar Halldórsson.
Íslensk félög fá tugi milljóna frá UEFA á hverju ári fyrir þátttöku í Evrópukeppnum. Íslandsmeistarar FH hafa undanfarin tvö tímabil farið beint í aðra umferð í Meistaradeildinni þar sem 550 þúsund evrur (62,4 milljónir króna á núvirði) fást fyrir þátttöku. Í Evrópudeildinni hafa íslensk félög fengið 200 þúsund evrur (22,7 milljónir króna á núvirði) fyrir fyrstu umferð og 210 þúsund evrur til viðbótar ef þau komast áfram í 2. umferð.
Formenn þriggja félaga í Evrópukeppnum mættu í sjónvarpsþátt Fótbolta.net í vikunni og ræddu um Evrópupeningana.
Formenn þriggja félaga í Evrópukeppnum mættu í sjónvarpsþátt Fótbolta.net í vikunni og ræddu um Evrópupeningana.
„Þetta gerir reksturinn auðveldari og þetta gerir klúbbinn meira heillandi út á við þegar þú ert að sækja leikmenn til dæmis,“ sagði Sæmundur Friðjónsson, formaður knattspyrnudeildar Stjörnunnar.
KR hefði mögulega þurft að lækka launakostnað
KR rétt náði Evrópusæti í fyrra eftir ótrúlegan endasprett í Pepsi-deildinni. Hefði félagið þurft að lækka laun hjá leikmönnum ef Evrópusætið hefði ekki komið í hús? „Mögulega hefðum við þurft að gera það. Kannski hefðum við ekki getað styrkt liðið og mögulega hefðu einhverjir leikmenn þurft að fara. Ég man eftir því að við höfum tvívegis þurft að setjast niður með leikmannahópnum okkar og breyta því sem búið var að semja um. Við settum það í hálfgerðan bónuspott. Auðvitað vilja menn standa við gerða samninga en þú verður að haga hlutunum eftir því hvar þú ert staddur,“ sagði Kristinn Kjærnested, formaður KR.
FH datt út á útivallarmörkum gegn írska liðinu Dundalk í 2. umferð Meistaradeildarinnar í fyrra. Höfðu FH-ingar gert ráð fyrir meiri tekjum af Evrópukeppni í fjárhagsáætluninni í fyrra?
„Ég sagði einhverntímann að við höfum aldrei gert knattspyrnudeildina út á lottómiða. Við förum í Evrópukeppni á hverju ári í eina umferð fyrir sig. Við vitum hvað er í hendi. Annað sem kemur til viðbótar er bónus. Við hefðum viljað fara lengra (í fyrra) og þar af leiðandi fengið meiri peninga en við vorum ekki búnir að áætla rekstrarlega séð að við myndum fara lengra,“ sagði Jón Rúnar.
„Þetta dettur með okkur íslensku liðunum einn daginn“
Dundalk fór alla leið í riðlakeppni Evrópudeildarinnar en félagið fékk yfir milljarð króna í tekjur af þátttöku sinni þar. Hvernig var tilfinningin hjá Jóni Rúnari þegar hann sá Dundalk fara svona langt? „Auðvitað samgleðstu þeim með það. Þú setur samt sjálfan þig í þessi spor og myndir gjarnan vilja vera í þeim. Þetta dettur með okkur íslensku liðunum einn daginn,“ sagði Jón Rúnar sem hefur fulla trú á að íslensk félög geti komist í riðlakeppni í Evrópukeppni.
„Þó að það væri bara í Evrópudeildinni þá eru þetta mjög háar fjárhæðir. Þær myndu breyta landslaginu mikið. Ég held samt að þetta myndi ekki breyta því þannig að það lið sem í því lendir yrði eitthvert eyland. Það myndi heldur aldrei ganga.“
Kristinn Kjærnested tekur undir það að íslensk félög eigi möguleika á að fara alla leið í riðlakeppnina. „Það eru möguleikar í þessu. Við erum heppin að því leytinu að sum þessara félaga sem við mætum eru off season. Það eru möguleikar í hendi. Maður stefnir þangað og hefur trú á því. Annars hefur maður ekkert að gera í þetta,“ saði Kristinn.
Hér að ofan má sjá umræðuna í heild sinni.
Sjá einnig:
Sjónvarpið: Hvað kostar að halda úti liði í Pepsi-deild karla?
