SKÝRSLAN: Markaregn og Valssigur í stórleik fyrstu umferðar
Hvað réði úrslitum?
Góður síðari hálfleikur skóp sigur Valskvenna. Heimakonur höfðu byrjað fyrri hálfleikinn vel og átt góðar 20 mínútur áður en gestirnir komust í gang og voru mjög öflugar síðari hluta fyrri hálfleiks. Eitthvað hefur Pétur þjálfari sagt við sína leikmenn í leikhléi því Valsliðið var framúrskarandi í síðari hálfleik og spilaði glimrandi flottan sóknarbolta. Lokatölur 5-2 í stórskemmtilegum leik þar sem mörk beggja liða hefðu auðveldlega getað orðið fleiri.
Bestu leikmenn
1. Hlín Eiríksdóttir
Hlín var frábær í dag. Kraftmikil og áræðin á hægri kantinum og skoraði sína aðra þrennu í efstu deild. Fyrstu þrennu Pepsi Max-deildarinnar í ár.
2. Elín Metta Jensen
Elín Metta var síógnandi í fremstu víglínu Vals. Hún er ótrúlega lunkin og skapaði fullt af hættulegum mómentum fyrir Valskonur.
Atvikið
Hlín skallar fyrirgjöf Margrétar Láru í netið. Skorar fimmta mark Vals, þriðja mark sitt og setur fyrstu þrennu Pepsi Max-deildarinnar í sumar.
Hvað þýða úrslitin?
Valskonur byrja mótið með stæl gegn silfurliði síðasta tímabils. Þær eru með þrjú mörk í plús og eru því í toppsætinu eftir þessa fyrstu umferð.
Vondur dagur
Síðari hálfleikurinn var skelfilegur fyrir flesta leikmenn Þórs/KA og bæði erfitt og ósanngjarnt að taka einhverja eina fyrir. Hópurinn tekur þetta á sig.
Dómarinn - 7,5
Það verða alltaf einhver vafaatriði í svona stórleikjum en tríóið stóð sig vel og var með aðalatriðin á hreinu.