SKÝRSLAN: Valskonur rændar Evrópudraumnum
Hvað réði úrslitum?
Ætla nú kannski ekki að ganga svo langt að skella skuldinni á dómara leiksins en hún átti sinn þátt í því þó. Valskonur fengu þó fína sénsa á að klára leikinn seint og í framlengingu sem ekki nýttust. Voru þó rændar vítaspyrnu undir lok framlengingar sem hefði vel getað ráðið úrslitum.
Bestu leikmenn
1. Lillý Rut Hlynsdóttir
Kraftmikil í vörn Vals og stöðvaði ófáar sóknir. Virkilega flottur leikur hjá flottum leikmanni.
2. Elín Metta Jensen
Endalaus dugnaður sem því miður skilaði ekki úrslitum í dag. Getur þó gengið stolt af eigin frammistöðu frá leiknum þótt úrslitin svíði mjög.
Atvikið
117 mínútur á klukkunni og Hlín Eiríksdóttir sloppinn framhjá varnarmanni sem rífur hana niður. Dómari og aðstoðardómari í fínni aðstöðu til að sjá brotið sem sést vel í sjónvarpi en skortir kjarkinn að flauta brot. Rándýrt atvik fyrir Val sem hefði getað klárað leikinn fyrir Val.
Hvað þýða úrslitin?
Valur fer í frí, Glasgow er áfram í Evrópu og verður í pottinum er dregið verður í 32.liða úrslit.
Vondur dagur
Valsliðið á vondan dag í sálarlífinu að leik loknum. Fótboltinn er grimm íþrótt og er þeim vorkunn að hafa fallið úr leik á þann hátt sem raunin er. Treysti þó á það að þær rífi sig upp og mæti grimmar til leiks á næsta tímabili.
Dómarinn - 4
Er langt í frá alveg hlutlaus en hin Slóvenska Aleksandra Cesen átti afleitan dag. Lítið samræmi í dómum hennar og risastór atriði sem hún klikkar á. Auðvitað tapaði hún ekki leiknum fyrir Val en setti klárlega mark sitt á leikinn og þróun hans.