SKÝRSLAN: Meistaravellir enn til vandræða fyrir KR-inga
Hvað réði úrslitum?
KA-menn komu miklu sterkari til leiks og stjórnuðu ferðinni fyrsta hálftímann, náðu að skora tvö mörk á þeim kafla og voru agaðir og þéttir til baka eftir það, KR-ingar reyndu hvað þeir gátu en bitinn var orðinn of stór.
Bestu leikmenn
1. Hallgrímur Mar Bergmann (KA)
Grímsi var stórkostlegur í dag! Tvö mörk og stoðsending, sífellt ógnandi og duglegur varnarlega líka.
2. Brynjar Ingi Bjarnason (KA)
Brynjar var frábær í vörn KA-manna, skoraði mikilvægt og gott mark sem kom KA í 2-0 og skallaði svo sirka 300 fyrirgjafir í burtu, ekkert út á hann að setja!
Atvikið
Sprellimarkið sem Ásgeir skoraði en Einar dæmdi svo af, ég veit eiginlega ekki enn afhverju hann dæmdi það af en ef það hefði fengið að standa hefði KA komist í 3-0 og Beitir litið ansi illa út í markinu.
Hvað þýða úrslitin?
KA eru taplausir með 4 stig eftir tvær umferðir, eiga næst leik gegn Leikni Reykjavík á Dalvík. KR-ingar fá skell á heimavelli eftir frábæran sigur gegn Blikum síðast og eru með 3 stig eftir tvær umferðir, næsti leikur KR-inga er gegn Fylki í Árbænum. KA menn á toppnum eins og er.
Vondur dagur
Ægir Jarl vinur minn verður fúll út í mig núna en hann átti ekkert merkilegan dag á miðju KR, missti boltann of oft á miðjunni og allavega tvisvar á hættulegum stað, hann á að vita það best sjálfur þó að hann hefur spilað mjög marga betri leiki en þennan í dag, sömu sögu má þó segja um fleiri eins og Atla Sig og Grétar Snæ...
Dómarinn - 6
Mér fannst Einar allt í lagi, ekkert alltaf sammála honum og stúkan alveg alls ekki en svona er þetta bara í boltanum, fínn leikur.