SKÝRSLAN: Gibbs tryggði Keflavík stigin þrjú
Hvað réði úrslitum?
Einstaklingsgæði Joey Gibbs í frábærri aukaspyrnu hans sem söng í netinu. Annars sóttu heimamenn meira heilt yfir í leiknum og geta eflaust talist sanngjarnir sigurvegarar
Bestu leikmenn
1. Joey Gibbs
Farinn að líkjast þeim leikmanni sem við sáum í fyrra og tímabilið þar áður. Tekur mikið til sín og er góður tengipunktur í spili Keflavíkur. Skoraði svo stórglæsilegt mark.
2. Adam Ægir Pálsson
Stoðsending auk þess sem hann sækir aukaspyrnuna sem Gibbs skorar úr. Flottur leikur hjá Adam.
Atvikið
Aukaspyrnan var algjört augnakonfekt og stendur upp úr fyrir mér.
Hvað þýða úrslitin?
Keflavík efst í neðri hlutanum og með sex stiga forskot á Fram sem nú leikur við Leikni og gæti minnkað bilið í þrjú stig. ÍA í vondum málum á botninum og þarf á sannkölluðu kraftaverki að halda til þess að halda sæti sínu.
Vondur dagur
Leikmenn beggja liða eiga lítið skilið að vera í þessum reit enda skildu allir allt eftir á vellinum fyrir sitt lið. Árni Marinó er eflaust ósáttur við vítaspyrnuna sem dæmd var á hann en hann verður seint sakaðurum tapið þrátt fyrir það. Annars fannst mér full mikill fókus hjá einhverjum í annars góðri stuðningssveit Keflavíkur fara á að vera með einhvern banter á Skagann og einstaka leikmenn þeirra. Banter sem slíkur er góður en þegar meira er um hann en stuðning við eigið lið er það kannski full mikið af því góða allavega fyrir minn smekk.
Dómarinn - 7
Átti Skaginn að fá víti? Ég sá atvikið ekki nægjanlega vel til þess að geta sagt af eða á með það. Set þó þann fyrirvara á einkunn mína að Einar hafi haft rétt fyrir sér.