SKÝRSLAN: Stórmeistarajafntefli á Kópavogsvelli
Hvað réði úrslitum?
Framan af var leikurinn mjög lokaður en eftir að Stjarnan braut ísinn þá opnaðist leikurinn heldur betur og það var eins og Breiðablik þorðu að taka fleiri áhættur eftir mark Stjörnunnar. Lokatölur 1-1, sanngjörn úrslit að mínu mati.
Bestu leikmenn
1. Gunnhildur Yrsa Jónsdóttir
Ég gat ekki talið hversu marga bolta Gunnhildur skallaði frá marki Stjörnunnar og svo var hún frábær í spili Stjörnunnar einnig, átti frábæra sendingu á Jasmínu Erlu undir lok leiks sem hefði mátt gera betur og skorað.
2. Hafrún Rakel Halldórsdóttir
Hafrún sótti vítið sem Agla María klúðraði og var heilt yfir mjög góð í leiknum, ógnaði mest í liði Breiðabliks.
Atvikið
Agla María klúðraði víti í stöðunni 0-1, þar sem hún skaut í stöngina en það kom ekki að sök þar sem Breiðablik jafnaði metin aðeins tveimur mínútum síðar.
Hvað þýða úrslitin?
Úrslitin þýða það að Breiðablik heldur sér í 2. sætinu með 13 stig. Stjarnan er í 4. sæti deildarinnar með 11 stig. Valskonur eru líklegast hæstánægðar með úrslitin í þessum leik og gefur jafnteflið þeim þriggja stiga forskot á Breiðablik.
Vondur dagur
Málfríður Erna Sigurðardóttir skoraði mjög óheppilegt sjálfsmark þar sem hún fékk boltann í andlitið og inn, virkilega klaufalegt.
Agla María klúðraði einnig víti þar sem hún skaut í stöngina, hver veit hvað hefði gerst hefði hún skorað úr vítinu.
Dómarinn - 8
Arnar Þór Stefánsson og fylgilið hans stóðu sig með prýði í dag, ekkert sem ég get sett út á. Dæmdu réttilega vítaspyrnu og voru með leikinn undir góðri stjórn.