SKÝRSLAN: Dramatískur sigur Þór/KA tryggði Val Íslandsmeistaratitilinn
Hvað réði úrslitum?
Þór/KA komu tilbúnar inn í þennan leik og pressuðu Blikana hátt og uppskáru færi í upphafi leiks, sem og Blikar. Þór/KA skoraði svo mark á lokasekúndum fyrri hálfleiks og snemma í síðari. Það sló þó Blika ekki alveg út af laginu sem gerðu vel og komu til baka og jöfnuðu metin en Þór/KA náði inn sigurmarkinu í uppbótartíma.
Bestu leikmenn
1. Sandra María Jessen
Algjörlega heilinn í sóknarleik Þór/KA. Skoraði gríðarlega mikilvægt mark í upphafi síðari hálfleiks.
2. Karen María Sigurgeirsdóttir
Var einnig góð í sóknininni hjá Þór/KA. Gerði hrikalega vel þegar hún skoraði fyrsta mark leiksins.
Atvikið
Á lokamínútum leiksins kom Bríet Fjóla Bjarnadóttir inn á en hún er fædd árið 2010 og er því gjaldgeng í 4. flokk og er langyngsti leikmaðurinn til að spila í deildinni í sumar.
Hvað þýða úrslitin?
Þór/KA klifraði upp úr botnsætinu í efri hlutanum en Blikar eru áfram í 2. sæti en baráttan um 2. sæti sem gefur Evrópusæti verður rosaleg á endasprettinum.
Vondur dagur
Það eru erfiðir tímar í Kópavogi um þessar mundir. Liðið átti erfitt uppdráttar í dag en gerði hrikalega vel í að koma til baka og jafna metin en það dugði því miður fyrir þær, ekki til.
Dómarinn - 7
Frábært flæði í leiknum í dag. Fór ekki mikið fyrir honum, góð dagsvinna hjá Aðalbirni.