SKÝRSLAN: Stjarnan upp í Meistaradeildarsæti eftir sigur á bitlausum sófameisturum
Hvað réði úrslitum?
Það var meira bit í sóknarleik Stjörnunnar í leiknum og sýnilega meira undir hjá Garðbæingum en Völsurum sem urðu Íslandsmeistarar í gær. Orkan var meiri og þessi auka 10% hjá öllum sýnileg inni á vellinum.
Bestu leikmenn
1. Andrea Mist Pálsdóttir
Skoraði eina markið og átti heilt yfir fínasta leik. Andrea var í góðum takti við leikinn og er mjög flæðandi í sinni stöðu fremst á vellinum.
2. Arna Dís Arnþórsdóttir
Fyrir sinn þátt í markinu og hluti af Stjörnuliði sem hélt hreinu gegn besta liði landsins.
Atvikið
Sigurmarkið var vel tekið, flott snörp sókn þar sem boltanum var skipt út til hægri af miðsvæðinu og svo ráðist á vörn Vals.
Hvað þýða úrslitin?
Stjarnan er komin í 2. sætið sem er markmið liðsins fyrir lok tímabilsins. Valur er í efsta sæti og er búinn að tryggja sér titilinn. Stjarnan er á fimm sigra skriði en sigurhrina Vals upp á fjóra deildarleiki í röð tók enda í kvöld.
Vondur dagur
Bitleysið fremst hjá Val var algjört. Valskonur voru fínar að færa boltann á milli sín og koma sér upp að vítateig en inni í vítateig Stjörnunnar var ekkert að frétta.
Dómarinn - 8
Jóhann Ingi vildi ekkert rugl varðandi leiktafir og óskaði eftir flæði í leiknum, veitti hagnað á góðum augnablikum og var með leikinn í teskeið. Engin stór atriði til að hækka hann meira.