SKÝRSLAN: Blikar áttu skilið þrjú stig í spennuþrungnu andrúmslofti
Hvað réði úrslitum?
Breiðablik voru betri á vellinum og þeir enduðu með 1,67 í xG á móti 0,41 í xG (miðað við gögn frá Flashscore) hjá Maccabi. Blikar nýttu ekki sín færi nægilega vel á meðan Maccabi skoraði mörk sem hefði verið hægt að koma í veg fyrir.
Bestu leikmenn
1. Gísli Eyjólfsson (Breiðablik)
Skoraði markið og var öflugur inn á miðsvæðinu. Hann er enn og aftur að sýna það að hann getur spilað á hærra stigi en í Bestu deildinni.
2. Viktor Karl Einarsson (Breiðablik)
Var líkt og Gísli mjög svo öflugur inn á miðsvæðinu. Jason Daði Svanþórsson var þá kraftmikill í sóknarleiknum. Höskuldur var jafnframt góður að venju.
Atvikið
Fyrra markið sem Maccabi skorar. Anton Ari á að gera betur en sólin truflar hann vissulega. Breiðablik var sterkari aðilinn í leiknum og þetta var högg rétt fyrir hálfleik. Fagnaðarlætin í kjölfarið sköpuðu mikinn hita en markaskorari Maccabi tók þá fram ísraelska fánann og ögraði áhorfendum á vellinum. Andrúmsloftið var spennuþrungið vegna mótmæla á vellinum og þetta var ekki eins og hver annar fótboltaleikur.
Hvað þýða úrslitin?
Breiðablik er enn án stiga fyrir lokaleik sinn í riðlinum. Vonandi ná þeir að taka stig gegn Zorya í lokaumferðinni.
Vondur dagur
Anton Ari átti alls ekki góðan dag í markinu og hefði átt að gera betur í báðum mörkunum. Hann er ekki með mikið sjálfstraust í augnablikinu, því miður. Þá voru Blikar ekki nægilega öflugir fyrir framan markið, að nýta færin sín.
Dómarinn - 3
Margar furðulegar ákvarðanir og leyfði þessu að fara í einhvern sirkus eftir fyrra markið. Var ekki með sérstaklega góð tök á þessum leik.