Úff...

Af hverju?

Austurríki að hóta sjötta markinu. Fankhauser með skot sem er ekki langt því að enda inni.

Það eru tíu mínútur eftir af venjulegum leiktíma, sem betur fer fyrir Ísland.

Linda Natter með skot sem Aldís ver í slána! Ísland nær svo að koma boltanum í burtu.

Nokkrir Englendingar virðast hafa ratað á völlinn. Eru að búa til skemmtilega stemningu á leiknum.

Emelía lék Schneiderbauer grátt þarna þegar hún klobbaði hana illa. Sendingin hennar hins vegar ekki alveg nægilega góð.

Afskaplega rólegt þessar síðustu mínútur. Það er lítið að gerast.

Stuðningsmenn Austurríkis skemmta sér vel í stúkunni. Örugglega búnir að fá sér nokkra Cerveza.

Austurríki nálægt því að bæta við fimmta markinu en skallinn fer fram hjá markinu.

Það er ágætis kraftur í íslenska liðinu fyrstu mínúturnar í seinni hálfleiknum.

Stórhættulegur bolti inn á teiginn og þar er Katla alein en hún nær ekki að hitta boltann. Þetta virðist ekki ætla vera dagurinn hennar Kötlu, því miður.

Katla með mjög fína tilraun af einhverjum 20-25 metrum. Fer rétt yfir markið.

Það er í raun óþarfi að segja eitthvað meira um þennan fyrri hálfleik. Viljum bara gleyma honum sem fyrst. Martaðarframmistaða.

Ísabella gerir frábærlega, á stórhættulega fyrirgjöf og Katla fær algjört dauðafæri inn á teignum til að minnka muninn. Hún setur boltann hins vegar yfir markið. Þessi hefði alveg mátt vera inni.

Austurríki að fá vítaspyrnu. Sigdís Eva brýtur af sér innan teigs. Hvað er að gerast hérna?

Hornspyrnan skapar stórhættu. Schneiderbauer mætir á fjærstöngina og setur boltann í stöngina.

Austurríki með skot að marki en Aldís nær að verja. Hefði mögulega getað gripið þennan en allt í lagi.

Austurríki talsvert líklegri til að skora þriðja markið en við að koma okkur aftur inn í leikinn.

Austurríki í stórhættulegri sókn og það er með hreinum ólíkindum að þær skori ekki þarna. Ekki mikil yfirvegun í þessu hjá íslenska liðinu. Við vorum svo heppnar sýndist mér að fá ekki á okkur vítaspyrnu.

Vigdís Lilja liggur eftir og þarf aðhlynningu. Vonum að þetta sé ekki alvarlegt. Börurnar eru á leiðinni inn á völlinn.

Austurríki á skot að marki en Aldís er vel á verði og blakar boltanum yfir markið.

Austurríki á hornspyrnu en Aldís kemur út og það er brotið á henni.

Ísland vinnur boltann hátt upp á vellinum. Snædís með mikla möguleika en er alltof lengi að athafna sig. Bæði Katla og Snædís falla í teignum, en Austurríki fær aukaspyrnu.

Írena með háan bolta fyrir markið og Sigdís nær skallanum en hann er arfaslakur. Austurríki fær í kjölfarið markspyrnu.

Emelía með frábært skot sem El Sherif ver afskaplega vel. Þetta var besta tilraun Íslands.

Enn og aftur fyrirgjöf hjá Austurríki inn á teiginn en skallinn fram hjá markinu.

Aftur á Austurríki hættulega fyrirgjöf út í teig Íslands en Aistleitner hittir boltann ekki, sem betur fer.

Besta sókn Íslands til þessa. Katla vinnur boltann og kemur honum út á Sigdísi Evu. Hún rekur boltann úti vinstra megin og kemur honum svo fyrir á gott svæði. Emelía kemur á ferðinni en varnarmaður Austurríkis er á undan í boltann.

Austurríki með hættulega fyrirgjöf en boltinn endar að lokum hjá Aldísi sem er gott að sjá.

Bergdís reynir skot að marki en það var aldrei líklegt. Fer beint í varnarmann.

Austurríki með fullt af stuðningsmönnum í stúkunni sem eru að láta vel í sér heyra.

Leikurinn fer rólega af stað, mikil stöðubarátta. Ég get ímyndað mér að þetta verði frekar lokaður leikur þar sem hér er mjög mikið undir.

Sólin skín á Spáni þegar leikurinn fer af stað. Þær austurrísku byrja á því að negla boltanum að marki frá miðju en Aldís er ekki í neinum vandræðum með að grípa. Heiðarleg tilraun.

Margrét Magnúsdóttir er þjálfari íslenska liðsins en hún þjálfar einnig U19 landsliðið. Hún valdi hóp fyrir um tveimur vikum síðan fyrir þennan leik. Hópurinn svipar til leikmannahópsins sem var á Evrópumótinu með U19 landsliðinu í sumar, en tvær sem eru gjaldgengar í hópinn eru í A-landsliðshópnum. Það eru þær Sædís Rún Heiðarsdóttir og Fanney Inga Birkisdóttir. Þrír leikmenn í hópnum léku í Lengjudeildinni í sumar. Þær komu frá Víkingi sem vann Mjólkurbikarinn og Lengjudeildina í sumar.

Lokakeppni HM U20 kvenna fer fram í Kólumbíu 31. ágúst – 22. september 2024. FIFA hefur ákveðið að fjölga þátttökuliðum í keppninni að þessu sinni og munu 24 lið taka þátt í stað 16 sem áður var. Evrópa fær fimm sæti. Liðin fjögur sem léku í undanúrslitum í lokakeppni EM U19 kvenna í Belgíu síðasta sumar komast til Kólumbíu og keppnin um fimmta sætið er á milli liðanna tveggja sem höfnuðu í þriðja sæti riðlanna tveggja á EM – Austurríkis og Íslands.

U20 landslið kvenna mætir Austurríki á Spáni í dag klukkan 16:00. Leikurinn er úrslitaleikur um laust sæti á HM 2024. Sjónvarp Símans sýnir leikinn í beinni útsendingu og opinni dagskrá á aðalrás sinni. Einnig verður hann í textalýsingu hérna.