SKÝRSLAN: Fyrsti sigur Stjörnunnar kom á móti 10 Völsurum
Hvað réði úrslitum?
Rauða spjaldið hafði mikið um það að segja. Stjarnan sótti stíft eftir það og náði markinu rétt fyrir hálfleik. Stjörnumenn róuðu síðan tempóið í seinni hálfleik og Valsarar reyndu eins og þeir gátu að sækja en það gekk ekki nógu vel og niðurstaðan var nokkuð öruggur sigur.
Bestu leikmenn
1. Helgi Fróði Ingason (Stjarnan)
Helgi var rosalega öflugur í sóknarleik Stjörnumanna og það er greinilegt að það er mikil framtíð í þessum 19 ára leikmanni.
2. Hilmar Árni Halldórsson (Stjarnan)
Hilmar var virkilega vinnusamur inn á miðjunni í dag og hann býr til markið sem Stjarnan skorar með stórkostlegum snúning inn á teig Valsara.
Atvikið
Rauða spjaldið sem Bjarni Mark fær á sig er alveg hrikalega klaufalegt. Bjarni var nýbúinn að fá gult spjald þegar hann ákveður að renna sér í bakið á Örvari Eggerts á vallarhelming Stjörnumanna. Réttilega seinna gula og hann skildi liðsfélaga sína eftir í súpunni.
Hvað þýða úrslitin?
Stjarnan sækir sín fyrstu stig í mótinu og eru því komnir með 3 stig. Valsarar eru með 4 stig eftir fyrstu 3 leikina sem er gríðarleg vonbrigði fyrir þá.
Vondur dagur
Bjarni Mark verður að fá þetta á sig þar sem þetta rauða spjald var svakalegur klaufaskapur og algjör óþarfi.
Dómarinn - 7
Erlendur átti góðan leik að mínu mati. Þetta var erfiður leikur með nóg af brotum og spjöldum en þau voru öll réttmætanlega fyrir mér nema mögulega spjaldið sem Kristinn Freyr fær fyrir að vera reiður út í eigin liðsfélaga.