SKÝRSLAN: Óvænt úrslit í Breiðholtinu
Hvað réði úrslitum?
Það sem réði úrslitum í dag var það að ÍR stelpur virtust vilja sigurinn meira en ÍBV liðið í dag. ÍR stelpur börðust eins og ljón og hentu sér fyrir skot ÍBV þrátt fyrir að vera einum færri í meira en 30 mínútur.
Bestu leikmenn
1. Linda Eshun
Linda var frábær í dag. Hún átti miðjuna frá upphafi til enda og kom samherjum sínum oft í mjög góðar stöður með áræðni og góðum sendingum. Hún barðist hetjulega eins og allt liðið og innsiglaði góða frammistöðu sína og sigur ÍR með því að skora í uppbótartíma.
2. Esther Júlía Gustavsdóttir
Esther átti mjög góðan leik í dag og kom í veg fyrir að ÍBV næði að skora. Hún átti nokkrar góðar vörslur og var mjög örugg í öllum sínum aðgerðum. 3 stig og hreint lak á hana í dag og hún fer sátt á koddann í kvöld. Guðný Geirsdóttir átti einnig góðan leik í dag þrátt fyrir að hafa fengið á sig 2 mörk. Hún hélt ÍBV liðinu oft á tíðum inn í leiknum með góðum vörlsum.
Atvikið
Sigríður Dröfn Auðunsdóttir fékk að líta sitt annað gula spjald og þar með afar klaufalegt rautt spjald í dag en það kom þó ekki að sök þar sem að það virtist ekki hafa mikil áhrif á ÍR liðið. Rauða spjaldið hefði getað haft meiri áhrif á leikinn og gjörbreytt honum.
Hvað þýða úrslitin?
Úrslitin þýða að ÍR hefur náð í sín fyrstu stig í Lengjudeild kvenna þetta árið en á meðan þurfa ÍBV stelpur að bíða lengur eftir sínum fyrstu stigum. Með sigrinum fer ÍR upp í 5. sæti en ÍBV stelpur fá sér sæti á botni deildarinnar með 0 stig.
Vondur dagur
Olga Sevcova er leikmaður sem má vænta mikils af og stóðst hún því ekki væntingar mínar í dag. Hún virtist á köflum áhugalaus og átti Suzanna Sofía Palma Rocha í bakverði ÍR ekki í vandræðum með hana í dag. Það voru samt margir leikmenn ÍBV sem að spiluðu einnig langt undir getu í dag.
Dómarinn - 7
Flottur leikur hjá Þorfinni í dag. Mér fannst hann vera öruggur í sinni ákvarðanatöku og með fína línu. Eina sem ég set út á frammistöðu hans í dag er að mér fannst hann eiga að dæma víti fyrir ÍR í fyrri hálfleik þegar að varnarmaður ÍBV fékk boltann augljóslega í höndina inn í sínum eigin teig.