Styttist Þá ganga liðin til vallar og þetta fer að byrja!

Liðin ganga til búningsklefa og gera sig klár í slaginn.

Byrjunarliðstíðindi! Heimamenn gera þrjár breytingar frá 4-1 tapinu gegn Stjörnunni á dögunum. Arnleifur Hjörleifsson, Oliver Stefánsson og Ingi Þór Sigurðsson koma inn í byrjunarliðið fyrir þá Anrór Smárason, Árna Salvar Heimisson og Marko Vardic. Rúnar Már og Arnór Smárason eru þá ekki í hópnum hjá Skaganum í dag.

Davíð Smári gerir fjórar breytingar á Vestraliðinu frá 3-2 tapinu gegn FH í Hafnarfirðinum seinustu helgi. Vladimir Tufegdzic, Ignacio Gil Echevarria, Sergine Modou Fall og Toby King koma inn í liðið fyrir þá Fatai Adebowale Gbadamosi, Silas Dylan Songani, Gunnar Jónas Hauksson og Tarik Ibrahimagic.

Tarik, leikmaður Vestra, og Marko Vardic, leikmaður ÍA taka út leikbann í dag.

Finniði lyktina? pic.twitter.com/8ByOHRxoEV

— Arnar Már Guðjónsson (@ArnarMarG) May 11, 2024

Leikirnir í fyrra Liðin mættust tvisvar sinnum í fyrra en báðir leikirnir enduðu með jafntefli.

Fyrsti í grasi hjá Skagamönnum Það hefur mikið verið í umfjölluninni að Skagamenn hafa spilað sína tvo fyrstu heimaleiki í ár inni í Akraneshöllinni sem margir hafa gagnrýnt. Í dag verður spilað á Akranesvellinum, grasinu, en þetta hafði Jón Þór að segja um völlinn seinasta þriðjudag:

„Hann lítur mjög vel út, en þetta er bara ónýtur völlur. Þegar það rignir þá nánast verður hann óleikhæfur vegna þess að hann drenar lítið sem ekki neitt og fer alveg á flot. Vegna vatnslagna á íþróttasvæðinu þá getum við ekki verið með vökvunarkerfi á vellinum og ekki vökvað hann þegar það er þurrt. Það segir sig því sjálft að það er mjög erfitt að halda góðum grasvelli við þannig. Þessi völlur er bara barn síns tíma og það eru allir að gera sitt allra besta til að hafa hann eins góðan og hægt er. Hann er miklu, miklu betri en í fyrra til dæmis en því miður er hann orðinn það gamall að það er mikið vandamál."

Gamli skólinn með flautumark Finnur Freyr Stefánsson, þjálfari Vals í körfubolta, er spámaður 6. umferðarinnar. Svona spáir hann vesturlandsslagnum:

ÍA 2-1 Vestri (laugardagur 14:00)
Smáradona með sigurmarkið í uppbótatíma. Neitaði að skipta útaf þótt hlaupatölu vestadæmið sýndi rautt. Gamli skólinn. Bíð spenntur eftir fyrsta heimaleik Vestra á Ísafirði hins vegar. Líklegur að kíkja vestur á leik og á Tjöruhúsið.

Teymið Það er enginn annar en meistari Pétur Guðmundsson, Pétur lögga, sem fær það verkefni að dæma þennan leik. Það er eitthvað sem segir mér að annað af þessum liðum, ef ekki bæði, verða eitthvað ósátt með dómgæsluna að leiks lokum en sjáum til. Aðstoðarmenn Péturs eru þeir Bryngeir Valdimarsson og Andri Vigfússon. Gunnar Oddur er þá skiltadómari en Gylfi Þór Orrason er eftirlitsmaður KSÍ.

Viljugir Vestramenn Eftir erfiða byrjun hafa Vestramenn náð að sækja tvo gífurlega sterka sigra og flotta frammistöðu á útivelli gegn FH. Vestramenn eru með jafn mörg stig og Skaginn eftir 5 leiki. Vestramenn sóttu tvo mikilvæga 1-0 sigra á KA og HK en fyrir utan það hafa þeir tapað gegn Fram, Breiðablik og FH. Verður að teljast, miðað við leikina, mjög góð byrjun. Menn eru einnig að segja að Vestraliðið hrökkvi aldrei almennilega í gang fyrr en um mitt sumar. En undirbúningstímabilið þeirra er kannski ekki alveg jafn hefðbundið og hjá öðrum liðum í Bestu deildinni.

Fín byrjun en samt ekki Eftir tvö sigra í röð eftir tap í fyrstu umferð gegn Val hafa Skagamenn tapað seinustu tveimur deildarleikjum. Skagamenn hafa hins vegar skorað flestu mörkin í deildinni fyrir utan auðvitað Breiðablik og Víking R. Varnarleikur Skagamanna hefur hins vegar alls ekki verið nógu góður. 6 mörk fengin á sig í seinustu tveimur leikjum og 9 mörk fengin á sig í fyrstu 5 leikjum sumarsins. 6 stig í fyrstu 5 deildarleikjunum, verður að teljast bara ágætis byrjun fyrir nýliða en Skagamenn vita það jafnvel og við að þeir geta gert mun betur og kannski eiga eitthvað innni.


Byrjar Rúnar Már í dag?
Það er eitthvað um skakkaföll hjá Skagamönnum á miðsvæðinu í dag hjá Skagamönnum. Það gæti hreinlega verið mjög líklegt að Rúnar Már Sigurjónsson, sem gekk í raðir ÍA á dögunum, byrji í dag.

Vesturlands- og nýliðaslagur! Hreint út sagt áhugaverður leikur sem byrjar í dag þegar Vestramenn koma í heimsókn á Akranes. Leikurinn verður spilaður á ELKEM vellinum og verður því fyrsti leikur Skagamanna á aðalvellinum í ár.