SKÝRSLAN: Mögnuð skemmtun á Akureyri
Hvað réði úrslitum?
Þetta var opinn og skemmtilegur leikur. Bæði lið fengu góð tækifæri til að skora fleiri mörk. Spurning hvort það var einhver bikarþynnka í KA því þetta var ekki nægilega gott, sérstaklega manni fleiri allan seinni hálfleikinn.
Bestu leikmenn
1. Birnir Breki Burknason
Frábær í sóknarleik HK.Bjó til slatta af færum og lagði upp tvö mörk, hefði getað skorað sjálfur en Stubbur sá einu sinni gríðarlega vel við honum.
2. Steinþór Már Auðunsson
Þetta er svolítið erfitt val, nokkrir sem koma til greina. Stubbur fékk vissulega á sig þrjú mörk en átti nokkrar frábærar vörslur og bjargaði stigi fyrir liðið. Dagur Ingi Valsson átti einnig flottan leik.
Atvikið
Tveir leikmenn sem skoruðu sín fyrstu mörk fyrir félögin sín í dag. Hinn 17 ára gamli Mikael Breki Þórðarson skoraði glæsilegt mark í sínum fyrsta byrjunarliðsleik fyrir KA. Þá skoraði Dagur Örn Fjeldsted einnig glæsilegt mark en það var hans fyrsta í búningi HK.
Hvað þýða úrslitin?
HK er tveimur stigum frá fallsæti en liðið mætir Vestra sem er fyrir neðan þá, í næsta leik sem vereður gríðarlega mikilvægur. KA ætlar sér að vera á toppnum í neðri hlutanum en liðið er tveimur stigum á eftir Fram í þeirri baráttu eftir úrslitin í dag.
Vondur dagur
Spurning hvað ellefu HK-ingar hefðu getað gert. Atli Hrafn Andrason lét reka sig af velli, umdeildur dómur vissulega en hættuleg tækling að fara í á gulu spjaldi. Einnig hægt að velta því fyrir sér hvort bikarþynnkan hafi verið til staðar hjá KA eftir að hafa nælt í bikarinn um helgina.
Dómarinn - 7
Flottur leikur hjá honum í dag. Það er umdeilt þegar hann gaf Atlia Hrafni Andrasyni sitt annað gula spjald en fyrir utan það gerði teymið vel.