SKÝRSLAN: Meistaraverk heima í Helsinki
Hvað réði úrslitum?
Þetta var algjört meistaraverk frá A til Ö hjá Sölva og hans teymi og liði Víkings. Það voru öll ljós kveikt hjá öllum sem komu að þessari frammistöðu Víkings. Enn einn kaflinn í þessa sögulegu Evrópuvegferð.
Bestu leikmenn
1. Ingvar Jónsson
Algjörlega geggjaður í markinu að öllu leyti. Þvílíkt öryggi sem smitaðist til samherja hans, frábærar vörslur og nýtti alla sína reynslu. Fimm stjörnu frammistaða.
2. Davíð Örn Atlason
Skoraði sitt fyrsta Evrópumark. Annars eiga hreinlega allir leikmenn Víkings hrós skilið fyrir þessa liðsframmistöðu.
Atvikið
Matti Villa átti frábæra innkomu og skoraði annað mark Víkings. Fyrst var dæmd rangstaða en eftir laaaangaaa VAR skoðun benti dómarinn á punktinn og það var partí í stúkunni.
Hvað þýða úrslitin?
Seinni hálfleikurinn er eftir, Víkingur fer með forystu inn í leikinn í Aþenu en sá leikur verður allt öðruvísi sýning og allt önnur sviðsmynd. Að vera með þetta veganesti með sér er hreinlega magnað.
Vondur dagur
Mótspyrna Víkings fór í taugarnar á mörgum Grikkjum en engum meira en Georgios Tzavellas, yfirmanni fótboltamála hjá Panathinaikos. Hann var alveg trítilóður á bekknum og reif kjaft við allt og alla. Krækti sér í gult spjald í leiknum og svo fékk hann sitt annað gula og þar með rautt fyrir að froðufella eftir leikinn.
Dómarinn - 5/10
Ekki mjög heilsteypt frammistaða. Erfiður leikur að dæma og hann var upp og niður.