SKÝRSLAN: Blikar fljúga inn í næstu umferð
Hvað réði úrslitum?
Breiðablik mætti inn í leikinn af gríðarlegum krafti. Hlupu af fullum krafti frá fyrstu mínútu og það skilaði sér. Markaveisla í fyrri háflleik hjá þeim og það hefði bara verið hægt að sleppa því að spila seinni hálfleikinn. Egnatia menn voru grafðir eftir þennan fyrri hálfleik.
Bestu leikmenn
1. Ágúst Orri Þorsteinsson (Breiðablik)
Ágúst skoraði tvö mörk og var frábær í leiknum. Síógnandi á hægri kantinum með hraða sínum.
2. Viktor Karl Einarsson (Breiðablik)
Viktor skoraði einnig tvö mörk. Var gríðarlega hættulegur í hlaupum sínum inn í teig og gerði vel í miðju baráttunni. Það eiga eiginlega allir leikmenn Breiðabliks skilið að eiga dálk í dag, en þessir tveir urðu fyrir valinu.
Atvikið
Fyrsta markið hjá Blikum. Frábær skyndisókn sem Ágúst kláraði svo vel. Maður sá það strax eftir þetta að það var gír í Breiðablik og þeir ætluðu sér ekkert annað en að vinna þennan leik.
Hvað þýða úrslitin?
Breiðablik fer áfram í aðra umferðina í forkeppni Meistaradeildarinnar. Þar mæta þeir Lech Poznan. Þeir hafa einnig tryggt sér að þeir fara að minnsta kosti í fjórðu og síðustu umferð Sambandsdeildarinnar með þessum sigri.
Vondur dagur
Egnatia sem heild áttu ekki roð í Blikana. Það var kannski sárast fyrir Anio Potsi sem var kippt af velli á 42. mínútu og það var ekki að sjá að hann væri meiddur.
Dómarinn - 8
Skotarnir áttu góðan leik að mínu mati. Ég var sérstaklega ánægður með að hann skyldi spjalda fyrirliða Egnatia á 29. mínútu fyrir tuð. Sá maður var búinn að vera vælandi síðan hann steig inn á völlinn og átti þetta spjald fyllilega skilið.