SKÝRSLAN: Njarðvík hálfu skrefi nær Laugardalsvelli
Hvað réði úrslitum?
Njarðvíkingar nýttu fleiri sénsa en Keflavík. Leikurinn sem slíkur jafn úti á velli og bæði lið áttu sín áhlaup. Eitt augnablik er samt nóg og Njarðvíkingar áttu einu augnabliki meira í leiknum sem dugði til sigurs.
Bestu leikmenn
1. Aron Snær Friðriksson
Aron var frábær í marki Njarðvíkur í kvöld. Gríðarlega öruggur í teignum og stýrði varnarlínunni fyrir framan sig sömuleiðis. Það má vel færa rök fyrir því að hann hafi mögulega gert gæfumunin í kvöld.
2. Stefan Ljubicic
Allt í öllu í sóknarleik Keflavíkur og var virkilega drífandi á vellinum fyrir liðsfélaga sína sömuleiðis.
Atvikið
Erfitt að horfa framhjá síðara gula spjaldi og þar með rauða á Oumar Diouck. Það var augljóst að hann var að reyna að sækja það en þreyttar lappir gerðu honum erfitt fyrir. Yrði áhugavert að vita hvað var rætt á þessum stutta fundi sem hann átti við Gunnar Heiðar á hliðarlínunni skömmu áður.
Hvað þýða úrslitin?
Njarðvík leiðir og er einu skrefi nær úrslitaleiknum á Laugardalsvelli en þetta einvígi er langt í frá búið.
Vondur dagur
Annað árið í röð sjáum við lið nýta sér reglugerð KSÍ um agamál og leikbönn sér til "hagsbóta" með því að velja að fá rautt spjald á leikmann sem er hvort sem er á leiðinni í bann til þess að stýra því hvenær hann tekur það út. Eftir að Afturelding gerði slíkt hið sama í fyrra í umspilinu er í raun óskiljanlegt að ekki hafi verið brugðist við gagnrýni sem vaknaði þá á síðasta ársþingi KSÍ og við séum aftur ári seinna í nákvæmlega sömu stöðu.
Dómarinn - 4
Vítadómurinn var réttur frá mínum bæjardyrum séð en þar hreinlega endar hrósið. Línan hjá Twana og teyminu var út um allt og oft á tíðum ekkert samræmi í ákvarðanatöku úti á vellinum. Augljósum brotum svo sleppt þegar skömmu síðar var dæmt á eitthvað sem ekkert var. Alls ekki hans besti dagur í dag.