Liðin skilja jöfn að í stórskemmtilegum leik. Viðtöl og skýrsla væntanleg.

Blikar hreinsa í aðra hornspyrnu, sem Valsmenn ná ekki að nýta.

Ögmundur blakar boltanum frá, Valsmenn keyra í skyndisókn og uppskera hornspyrnu!

Breiðablik fær hornspyrnu.

Vilhjálmur dæmir hendi á Blika!

Valur fær hornspyrnu.

Aron Jó með skalla úr teignum en Anton Ari ver örugglega.

Breiðablik skallar síðari hornspyrnuna frá.

Valsmenn fá hornspyrnu, Tryggvi kemur með fallhlífarbolta í teiginn, boltinn af Blika og í aðra hornspyrnu.

Kristófer Ingi tekur skemmtilegan snúning fyrir utan teig og fer í skotið en Ögmundur ver vel í marki Vals.

Nóg eftir!

Aron Jó dansar með boltann utarlega í teignum, neglir honum fyrir og Ásgeir Helgi hreinsar í horn.

Einhver kýtingur á milli Birkis Heimissonar og Tobias Thomsen, Vilhjálmur Alvar dómari ræðir stuttlega við þá bræður og róar þá niður.

Valsmenn keyra upp í skyndisókn, fyrirgjöf frá vinstri í teiginn og Aron Jó stekkur á boltann og stangar hann rétt framhjá marki Blika.

Óli Valur spænir sig í gegnum vörn Vals, kominn í góða stöðu en fer hikandi í skotið og boltinn fer í varnarmann og Valsmenn koma hættunni frá.

Valsmenn í leit að sigurmarki en hafa skapað sér lítið síðustu mínútur.

Kristófer Ingi liggur niðri eftir hressilega tæklingu frá Hólmari Erni sem ekkert var dæmt á. Leikurinn stopp.

Kristófer Ingi lætur vaða fyrir utan teig eftir laglegt spil Blika, Ögmundur ver þó örugglega í marki Vals.

Jónatan Ingi í góðri stöðu í teignum, en tekur sér of langan tíma og varnarmaður Blika kemur sér fyrir skotið!

Valur fær hornspyrnu, boltinn á Anton Ara sem missir hann og Hólmar Örn nær að pikka í boltann en skotið yfir!

Valgeir stjakar við Kristni Frey í teignum sem fellur við, en ekkert dæmir Vilhjálmur. Hefði verið soft.

Lúkas Logi með skot á lofti sem fer í þverslánna og yfir!

Höskuldur tekur hornið en Valsmenn skalla frá.

Kristófer Ingi fær boltann í teig Valsmanna og fer í skotið en Ögmundur ver vel og Blikar fá hornspyrnu.

Valsmenn fá hornspyrnu, lár bolti í teiginn sem enginn Valsari kemst í. Liðið nær þó að halda í boltann.

Sama saga og í upphafi leiks, glimmer út um alla stúku og inn á völl. Þó engir flugeldar í þetta skiptið. Ekki veit ég hvers vegna stuðningsmannasveit Blika er að þessu, ætli þeir séu að reyna að safna sektum?

Engar breytingar á liðunum í hálfleik.

Valur - Breiðablik 45% - Með Bolta - 55% 11 - Skot - 10 3 - Skot á mark - 3 3 - Hornspyrnur - 9

Stórskemmtilegur fyrri hálfleikur að baki þrátt fyrir að staðan sé enn markalaus. Eftir góða byrjun Breiðabliks komu Valsmenn sér betur inn í leikinn, jöfn staða eflaust sanngjörn.

Þremur mínútum bætt við.

Óli Valur með góða fótavinnu í teig heimamanna, færir sig yfir á hægri og þrumar boltanum rétt framhjá marki Vals.

Breiðablik fær aukaspyrnu í góðu skotfæri. Tobias Thomsen stígur upp og tekur skotið en setur boltann beint í vegginn. Blikar fengu aukaspyrnu á sama stað fyrr í leiknum og endaði það á nákvæmlega sama hátt, nema þá lét Höskuldur Gunnlaugsson vaða.

Valur fær hornspyrnu. Boltinn á Markus Nakkim á nærsvæðinu sem setur boltann rétt framhjá.

Valsarar keyra í skyndisókn. Tryggvi Hrafn nýtir hraðann og keyrir á teiginn. Þar lætur hann vaða en Anton Ari ver vel.

Valsmenn halda í boltann eftir hornspyrnuna. Boltinn fer í gegnum allan pakkann og á fjær. Þar lúrir Tryggvi Hrafn sem hittir ekki boltann nægilega vel og nær ekki að stýra honum á rammann.

Damir með herfilega sendingu til baka á Anton Ara sem nær ekki til knattarins og úr þessu uppskera Valsmenn hornspyrnu.

Kristinn Freyr liggur niðri eftir einvígi, leikurinn stopp og menn ræða málin. Birkir Heimisson stjakar örlítið við Valgeiri Valgeirssyni sem ýkir þetta vel og tekur um tíu skref til baka líkt og honum hefði verið hrint harkalega. Skemmtilegir leiklistatilþrif frá afmælisbarninu Valgeiri Valgeirssyni.

Valsmenn fá nú hornspyrnu. Boltinn út í teiginn á Lúkas Loga sem lúðrar á markið en skotið rétt framhjá.

Blikar að fá sína fjórðu hornspyrnu í röð. Boltinn fyrir markið en Ögmundur kýlir hann frá.

Óli Valur með góða takta og þrumar á markið úr teig Valsmanna en Ögmundur ver í horn.

Markus Nakkim með frábæran bolta í gegn á Jónatan Inga sem er við það að sleppa í gegn en Kristinn Jónsson gerir vel og kemur hættunni frá.

Lúkas Logi með marktilraun en boltinn yfir mark Breiðabliks.

Breiðablik fær aukaspyrnu á hættulegum stað. Höskuldur tekur skotið en boltinn fer beint í varnarvegg heimamanna.

Gestirnir mun hættulegri hér í upphafi leiks, einoka boltann þessa stundina.

Kristófer Ingi leggur boltann fyrir sig og lætur vaða við vítateig en Ögmundur ver örugglega í marki Vals.

Blikar fá aukaspyrnu utarlega við vítateig. Kristinn Jónsson lætur vaða en Ömmi kýlir boltann frá.

Gestirnir fá hornspyrnu, Kristinn Jónsson tekur en Markus Nakkim skallar frá.

Birkir Heimis með þrumuskot fyrir utan teig sem hafnar í þverslánni. Þvílík byrjun á þessum leik!

Breiðablik fær fyrstu hornspyrnu leiksins en spyrnan fer yfir pakkann og aftur fyrir endalínu.

Boltinn í teig heimamanna og úr verður misskilningur á milli Ömma og Hólmars, hvorugur fer í boltann og hann á leiðinni í markið en Orri Sigurður bjargar á línu!

Við fáum flugeldasýningu hér rétt fyrir utan völlinn. Stuðningsmenn Breiðabliks sprengja í kjölfarið líklegast stærstu konfettí sprengju sem ég hef séð. Gott ef að þetta verði ekki sekt. Glimmerið umlykur stúkuna, varamannabekkina og völlinn.

Tobias Thomsen byrjar leikinn á að sparka boltanum í innkast.

Liðin ganga til vallar, styttist í þetta.

Kristinn Jonsson fær það verðuga verkefni að dekka Jonatan sem fer mikið einn á einn, Gult spjald á Kristinn á Epic er 5 í stuðul, skemmtilegt.

Srdjan Tufegdzic, þjálfari Vals, gerir tvær breytingar frá 1-2 tapi gegn Stjörnunni í síðustu umferð. Jakob Franz Pálsson og markvörðurinn Stefán Þór Ágústsson taka sér sæti á bekknum. Í þeirra stað kemur fyrirliðinn Hólmar Örn Eyjólfsson og Ögmundur Kristinsson. Hólmar snýr aftur eftir að hafa tekið út leikbann í síðasta leik. Ögmundur spilaði síðast deildarleik fyrir Val þann 16. september á síðasta ári. Síðasti leikur Ögmundar fyrir Val var í mars en þá var hann rekinn af velli í sigri Vals á ÍR í undanúrslitaleik Lengjubikarsins. Halldór Árnason, þjálfari Breiðabliks, gerir þrjár breytingar frá 1-1 jafntefli gegn ÍBV í síðasta leik Breiðabliks. Inn í byrjunarliðið koma þeir Kristinn Jónsson, Viktor Örn Margeirsson og Tobias Thomsen. Úr byrjunarliði Breiðabliks víkja þeir Kristinn Steindórsson, Ásgeir Helgi Orrason og Davíð Ingvarsson. Kristinn er í leikbanni en Davíð er frá vegna meiðsla.

Fótbolti.net ræddi við Kristin Jónsson, vinstri bakvörð Breiðabliks, í aðdraganda leiksins. „Auðvitað vitum við að Valur er með sterkt lið og er það lið sem hefur verið hvað sterkast á heimavelli í ár. En við erum búnir að undirbúa okkur mjög vel, liðið er í góðu líkamlegu formi og allir einbeittir á að ná í góð úrslit,” segir Kristinn. Er eitthvað sérstakt sem þið þurfið að loka á hjá þeim? „Miðað við hvernig síðasti leikur spilaðist geri ég ráð fyrir að þeir liggi meira til baka og reyni að nýta hraðann sinn fram á við til að sækja hratt þegar tækifæri gefast. Fyrir okkur er lykilatriði að halda boltanum, stjórna tempóinu og setja þá undir stöðuga pressu. Við þurfum líka að vera vel vakandi í transition og í föstum leikatriðum.” Fimm leikir eru eftir af mótinu. „Þeir leggjast mjög vel í mig. Framundan eru fimm erfiðir leikir þar sem við þurfum að eiga toppframmistöður til að eiga möguleika á Evrópusæti.”

Fyrri leikir á tímabilinu: Breiðablik 2-1 Valur, Valur 2-1 Breiðablik. Til að fylgjast með: Við setjum bara þjálfarana í þennan flokk. Pressan á Túfa og Dóra er mikil og það verður líf í boðvöngunum. Mikið mun mæða á: Höskuldur Gunnlaugsson fyrirliði Breiðabliks þarf að keyra sína menn áfram eftir vont gengi upp á síðkastið.

Í Kópavogi eru menn ekki sáttir við frammistöðuna né gengið hjá Breiðabliki eins og fjallað hefur verið rækilega um. Segja má að skorin hafi verið upp herör gegn Halldóri Árnasyni þjálfara og stjórnendum hjá mest áberandi röddum stuðningsmanna Breiðabliks í hlaðvörpum og víðar. Íslandsmeistararnir hafa ekki fundið taktinn og er án sigurs í síðustu sjö leikjum. Liðið er komið í Sambandsdeildina en mikil ólga þó í kringum félagið og mikil hætta á að liðið verði ekki í Evrópu á næsta tímabili. Ekki eru margar vikur síðan Halldór gerði nýjan samning en síðan hefur illa vegnað.

Valsmenn hafa misst toppsæti deildarinnar eftir að hafa tapað þremur af síðustu fjórum leikjum. Þeir halda sér í titilbaráttunni en vonin hefur veikst verulega eftir að ljóst var að Patrick Pedersen og síðan Frederik Schram yrðu ekkert meira með á tímabilinu. Túfa setur stefnuna að sjálfsögðu áfram á titilinn og sér væntanlega kjörið tækifæri á þremur stigum á heimavelli gegn liði í krísu.

Heilir og sælir lesendur góðir og verið velkomin í beina textalýsingu frá viðureign Vals og Breiðabliks í Bestu-deild karla.