SKÝRSLAN: Kortlögð klókindi í kuldanum á KA-velli
Hvað réði úrslitum?
Fylkir mætti Þór í frostinu á Greifavellinum og það voru klókindi og vilji sem urðu til þess að Árbæingar keyra nú suður yfir heiðar með farmiðann í úrslitaleikinn í farteskinu. Þórsarar voru meira með boltann en gestunum leið ekki illa með það. Fylkismenn sluppu mjög oft í gegnum vörn heimamanna með einfaldri sendingu upp völlinn. Það var vel kortlagt hjá gestunum, sáu veikleika hjá heimamönnum, en Þórsarar hljóta að hafa áhyggjur af því að svona einfalt hafi verið að komast í góðar stöður gegn þeim.
Bestu leikmenn
1. Guðmundur Tyrfingsson
Mark og stoðsending hjá Guðmundi í kvöld. Átti góðan dag í framlínunni, fær mikið frjálsræði í kringum Eyþór Wöhler og hefði getað skorað fleiri mörk í leiknum. Leikmaður sem hæglega gæti spilað í efstu deild.
2. Ólafur Kristófer Helgason & Hlynur Sævar Jónsson
Áttu mjög góðan leik aftast á vellinum. Ólafur Kristófer las Greko einu sinni í dauðafæri og Hlynur Sævar virkaði vel með Orra Segatta í öftustu línu. Kristófer Kristjánsson var að mínu mati besti leikmaður Þórs í leiknum.
Atvikið
Annað markið, Guðmundur Tyrfingsson átti langa sendingu inn fyrir á Benedikt Daríus sem nýtti hraðan sinn og hélt bæði Affi og Ásbirni frá því að komast í boltann. Benedikt lagði svo boltann framhjá Aroni Birki í marki Þórs og tryggði Fylki í úrslitaleikinn.
Hvað þýða úrslitin?
Lengjudeildarlið Fylkis fer annað árið í röð í úrslitaleik Lengjubikarsins. Fylkir tekur á móti KR á laugardag. Næsti skráði leikur hjá Þór er eftir eina og hálfa leik þegar liðið mætir KA í úrslitaleik Kjarnafæðimótsins.
Vondur dagur
Færanýting og stundum ákvarðanataka fremstu manna Þórs fá þetta. Ingimar Arnar, Greko og Ágúst Eðvald fengu sénsa til að skora í þessum leik og búa til fleiri góðar stöður en það tókst ekki. Það er líka langt síðan Yann Affi var jafn óöruggur með sjálfan sig í öftustu línu.
Dómarinn - 6
Ég missti af of mörgum atvikum þar sem ég var að skrifa um leikinn á símann minn til að meta frammistöðu Sigurðar almennilega. Fannst vanta flæði í leikinn á köflum en ekkert alltaf sem Sigurður gat eitthvað gert í því.