SKÝRSLAN: Agalegt
Hvað réði úrslitum?
Fyrsti grasleikur Bestu deildarinnar endaði markalaus í gæðalitlum leik án hápunkta. Aðstæður höfðu sitt að segja á þungum vellinum og því miður endaði þessi leikur sem agalega vond auglýsing. Skemmtanagildið undir frostmarki.
Bestu leikmenn
1. Davíð Helgi Aronsson - Keflavík
Sterkasti leikmaður umferðarinnar kemur ekki úr þessum leik en Keflvíkingar völdu varnarmanninn unga Davíð Helga Aronsson sem mann leiksins og ég er alveg klár í að kvitta bara undir. Hann og Nacho Heras náðu mjög vel saman.
2. Ásgeir Helgi Orrason - Breiðablik
Það er vel við hæfi að velja bara annan ungan miðvörð í þennan dálk. Hann og Ívar Örn Árnason öruggir í sínu.
Atvikið
Það segir sitt að mesta klappið úr stúkunni kom þegar Arnar Laufdal samfélagsmiðlastjóri Breiðabliks lék listir sínar. Hann stóð fyrir aftan annað markið með myndavélina og uppskar fagnaðarlæti úr stúkunni þegar hann tók á silkimjúkan hátt á móti boltanum eftir að hann flaug afturfyrir. Ein bestu tilþrif leiksins, ég er því miður ekki að grínast með það!
Hvað þýða úrslitin?
Keflvíkingar eru komnir á blað og Blikar eru enn ósigraðir með fimm stig og markatöluna 2-1 eftir þrjá leiki.
Vondur dagur
Blikar hafa verið bitlausir í upphafi móts og Kristófer Ingi þarf að fá betri þjónustu, meðal annars frá köntunum. Jónatan Guðni og Óli Valur fundu sig engan veginn í kvöld en hafa það sér til málsbóta að aðstæður voru erfiðar.
Dómarinn - 9
Sigurður Hjörtur byrjar tímabilið virkilega vel.