SKÝRSLAN: ,,Rekinn í hálfleik”
Hvað réði úrslitum?
Víkingar byrjuðu leikinn af ógnarkrafti án þess þó að skora. Yfirburðirnir miklir og voru Garðbæingar í stúkunni orðnir áhyggjufullir. Eitthvað varð undan að láta og eftir tæpan hálftíma leiddu Víkingar eftir mark Gylfa Þórs úr vítaspyrnu. Skömmu síðar juku þeir forystuna í 2-0 og þar við sat í hálfleik. Andleysi Stjörnunnar gífurlegt. Í seinni hálfleik breyttist þó takturinn og bitu heimamenn frá sér. Damil Dankerlui minnkaði muninn skömmu eftir hlé. Víkingar voru þá snöggir að slökkva í vonum Garðbæinga og komust í 3-1 forystu aðeins tíu mínútum síðar. Lokatölur 3-1 í sannfærandi sigri Íslandsmeistarana.
Bestu leikmenn
1. Valdimar Þór Ingimundarson (Víkingur R.)
Auðvelt val, skoraði laglegt mark, með enn betri stoðsendingu og sótti vítið. Það að hann sé að spila í Bestu deildinni jaðrar við svindl.
2. Gylfi Þór Sigurðsson (Víkingur R.)
Hrifsaði boltann í vítinu og skoraði eins og honum einum er lagið. Einfaldlega frábær í kvöld
Atvikið
Stuðningsmenn Víkings sungu ,,Rekinn á morgun” og beindu söngnum að Jökli Elísabetarsyni eftir að liðið komst í 2-0 forystu í fyrri hálfleik. Þá tók stuðningsmaður Stjörnunnar á það bragð að syngja: ,,Rekinn í hálfleik,“ og Garðbæingar klöppuðu. Trúin greinilega ekki mikil í Garðabæ.
Hvað þýða úrslitin?
Sigurhrina Víkinga heldur áfram, unnið átta leiki í röð í deild. Staðan í Garðabæ er ansi svört og hefur liðið ekki unnið í deild síðan 17. apríl, þegar liðið lagði FH að velli í 2. umferð.
Vondur dagur
Sindri Þór og Gustav Kjeldsen voru saman í hjarta varnarinnar hjá Stjörnunni. Þeirra meginhlutverk er að gefa eins fá færi á sig og mögulegt er. Það gekk ekki upp. Víkingar fundu allt of margar glufur í vörninni og fá þeir því þessa nafnbót.
Dómarinn - 7
Jóhann Ingi dæmdi vítaspyrnu á Árna Snæ eftir að hafa farið út í Valdimar. Snertingin var lítil, ef einhver, en ég skil Jóhann vel að hafa flautað þar sem Árni fór hratt út. Set spurningamerki þar, annars heilt yfir flottur leikur hjá kvartettnum.