Það er einfalt. Njarðvíkingar mættu gríðarlega ákveðnir til leiks og settu Leiknismenn undir mikla pressu strax frá fyrstu mínútu. Gestirnir áttu erfitt með að halda boltanum og koma sínum leik af stað. Þótt leikurinn hafi jafnast út eftir því sem leið á hann komust Leiknismenn aldrei nálægt því að ógna marki Njarðvíkur að neinu ráði. Varnarleikur heimamanna var til fyrirmyndar og fær hæstu einkunn frá mér í dag.

Atvik leiksins var líklega þegar Leandro Fernandes fór niður í teignum í seinni hálfleik og kallaði eftir vítaspyrnu. Erfitt var að sjá atvikið almennilega af vellinum og því erfitt að leggja mat á hvort rétt ákvörðun hafi verið tekin. Davíð Smári var hins vegar afar ósáttur við að ekkert hafi verið dæmt.

Þrátt fyrir tapið halda Leiknismenn sæti sínu í bili. Þeir komu inn í leikinn á góðu skriði eftir þrjá sigra í röð, en urðu að sætta sig við að sú sigurganga tæki enda í Njarðvík. Heimamenn hins vegar lyfta sér upp í 7. sæti deildarinnar með 14 stig og eru nú aðeins einu stigi á eftir Leikni.

Það er erfitt að taka einn leikmann út úr, þannig að þetta fer á sóknarlínu og miðju Leiknis í heild sinni. Liðið skapaði sér fáránlega lítið í sóknarleiknum og komst sjaldan nálægt því að ógna marki Njarðvíkur.

Róbert átti heilt yfir góðan leik. Þetta var ekki auðveldur leikur að dæma þar sem mikið var um hörð návígi og baráttu um allan völl, en honum tókst að halda góðri stjórn á leiknum. Hann leyfði leiknum að flæða þegar það átti við og var ekki að stöðva hann að óþörfu. Það má kannski færa rök fyrir því að Njarðvíkingar hafi sloppið við gult spjald í einu eða tveimur atvikum, en á heildina litið var dómgæslan traust og lítið hægt að setja út á hana.