SKÝRSLAN: Fylkir gekk frá andlausum Njarðvíkingum í fyrri hálfleik
Hvað réði úrslitum?
Þessi sigur var afskaplega sannfærandi. Fylkismenn keyrðu yfir Njarðvíkinga í fyrri hálfleiknum og uppskáru sanngjarna 4-0 forystu í hálfleik. Varnarmenn Njarðvíkinga réðu engan veginn við hraðann á sóknarmönnum Fylkis. Heimamenn voru líka töluvert betri í þeim síðari en Guy Smit sá til þess að ekki fór verr.
Bestu leikmenn
1. Birkir Eyþórsson
Stýrði umferðinni á miðjunni. Var grimmur í öllum einvígum og hljóp úr sér lungun. Ekki skemma tvö mörk fyrir.
2. Guðmundur Tyrfingsson
Var góður í dag eins og alltaf. Gífurlega hraður, kraftmikill og hættulegur leikmaður. Skoraði tvö mörk og er nú markahæsti leikmaður deildarinnar ásamt Óðni Bjarkasyni með 11 mörk.
Atvikið
Guy Smit fer í skógarhlaup í byrjun seinni hálfleiks. Hann vinnur kapphlaupið gegn Theodóri Inga og kemur boltanum í innkast sem Fylkir reynir að taka hratt. Hann og Theodór flækjast hins vegar saman á leið hans í markið. Arnar dómari flautar þegar Guy fer auðveldlega í grasið og Fylkir þarf að taka innkastið aftur.
Hvað þýða úrslitin?
Fylkir er enn í öðru sæti deildarinnar en minnkar forskot Aftureldingar í eitt stig. Árbæingar eru með 30 stig eftir 14 leiki. Njarðvík er í 6. sæti með 20 stig.
Vondur dagur
Njarðvíkurliðið. Davíð Smári fór vel yfir frammistöðu liðsins sem var alls ekki góð. Fyrstu 60 mínúturnar voru sérstaklega lélegar og sex marka forysta hefði líklega verið sanngjörn eftir þær.
Dómarinn - 6
Vítadómurinn var réttur hjá Arnari. Var ekki sammála öllu en fínn leikur hjá Arnari engu að síður.