Twana flautar til leiksloka. Sanngjarn 2-0 sigur Mosfellinga staðreynd. Afturelding komnir í frábæra stöðu og hér er fagnað. Viðtöl og skýrsla koma inn í seinna í kvöld, ég þakka fyrir mig.

Að lágmarki þremur mínútum bætt við.

Bjartur Bjarmi reynir skot utan af velli en skotið framhjá.

Aukaspyrna í fyrirgjafastöðu hjá Gróttu en Arnar gerir vel.

Grótta hefur haldið vel í boltann síðustu 10 mínútur en það er erfitt að brjóta niður vörn heimamanna.

Leikurinn hefur róast mikið undanfarnar mínútur, hvorugt liðið líklegt til þess að skora í augnablikinu.

Tristan tekur aukaspyrnuna sem er slök og hún fer vel framhjá markinu.

Mattías Kjeld vinnur boltann á miðjunni og fær flugbraut. Hann tekur á rás og kemur svo með sendinguna inn fyrir á Axel sem er einn á móti Arnari en rangstaða dæmd. Mögulega ekki réttur dómur.

Er löngu búinn að missa tölu á hornspyrnum heimamanna. Þær eru orðnar margar.

Enes tekur hornspyrnu sem fer beint á kollinn á Bart sem á skallann en aftur ver Guðmundur vel.

Axel með langt innkast inn í teiginn. Bart flikkar honum áfram á Joacim sem tekur skotið á lofti í fyrsta en Guðmundur ver vel.

Heimamenn komnir upp að endamörkum, sendingin út í teiginn á Sævar sem á skotið beint í Gróttumann sem hendir sér fyrir skotið.

Axel sparkar seinni hálfleiknum af stað.

Twana flautar hér til hálfleiks. Afturelding hafa verið sterkari aðilinn í þessum fyrri hálfleik en Grótta hefur líka fengið sín færi. Tökum okkur korter.

VÁ þetta hefði orðið flott mark. Sævar Atli með svakalegan sprett inn í teiginn, klobbar einn, kemst framhjá öðrum og ákveður að taka skotið sem fer rétt framhjá. Áhorfendur héldu að þessi hafi farið inn.

Afturelding búnir að fá fjórar hornspyrnur á mjög stuttum tíma en þær hafa allar verið illa útfærðar.

Það er allt annað að sjá til Mosfellinga eftir markið.

Boltinn kominn upp að endalínu og sendingin kemur út í teiginn þar sem Bart er óvaldaður. Hann hefði mögulega mátt vera fljótari að ná skotinu en það fer beint í Gróttumann. Óðinn nær frákastinu en aftur komast Gróttumenn fyrir. Illa farið með góða stöðu.

Grótta fær aukaspyrnu á hættulegum stað.

Grímur Ingi með spyrnuna í markmannshornið en Arnar vissi alltaf að þetta væri á leiðinni yfir.

Grótta í vandræðum með að koma boltanum frá og Óðinn nær valdi á honum í fínni stöðu en skotið yfir markið. Fyrsta almennilega skotfæri heimamanna.

Mér finnst eitthvað vanta sóknarlega hjá Aftureldingu. Þeir hafa haldið vel í boltann og komist í ágætar stöður en um leið og boltinn nálgast teiginn verða þeir kærulausir.

Óðinn reynir fyrirgjöfina inn í teiginn en boltinn beint í fangið á Guðmundi.

Gestirnir hafa verið ívið sterkari þessar fyrstu mínútur en annars hefur lítið verið að frétta.

Björgvin Brimi með hættulegan bolta inn í teiginn á Einar sem sendir fyrir en Afturelding hreinsar í horn.

Kröftugur sprettur hjá Kristóferi Dan sem vinnur aukaspyrnu á hættulegum stað fyrir gestina. Mattías Kjeld stendur yfir boltanum.

Hann vill líklega gleyma þessari spyrnu sem fyrst, hátt yfir markið.

Joacim Holtan sparkar þessu af stað!

Nóg af fólki í stúkunni á þessu fína þriðjudagskvöldi. Mosfellingar vita hvað er undir í dag. Heimasigur þýðir ekkert annað en að Afturelding verður með 9 fingur á Lengjudeildartitlinum fyrir síðustu tvær umferðirnar.

Maggi gerir eina breytingu á sínu liði eftir slátrunina á Ægi í síðustu umferð. Óðinn Bjarkason kemur inn í liðið í stað Enes Cogic.

Rúnar gerir fimm breytingar frá tapinu gegn ÍR í síðustu umferð. Inn í liðið koma Jónatan Ari Bragason, Patrik Orri Pétursson, Axel Sigurðarson, Einar Tómas Sveinbjarnarson og Kristófer Dan Þórðarsson. Hrannar Ingi Magnússon, Andri Freyr Jónasson, Halldór Hilmir Þorsteinsson, Tristan Freyr Ingólfsson og Emil Skúli Einarsson eru teknir úr liðinu.

Liðin mættust á Vivaldi-vellinum í fjórðu umferð deildarinnar. Leikurinn fór 3-1 fyrir Mosfellingum. Mark Gróttu skoraði Grímur Ingi Jakobsson en mörk Aftureldingar skoruðu Bart Kooistra, Elmar Cogic og Óðinn Bjarkason sem er markahæsti leikmaður deildarinnar ásamt Dominik Radic í HK með 14 mörk hvor.

Hér má sjá allt það helsta úr leiknum.

Gengi Gróttu í sumar hefur verið kaflaskipt. Þeir hafa náð að tengja saman sigra en svo hafa þeir lent í brekkum. Nú eru þeir í einni slíkri.


Þeir hafa ekki unnið í síðustu fjórum leikjum, tvö jafntefli og tvö töp. Í síðustu tveimur umferðum hafa þeir tapað 3-1 á heimavelli gegn ÍR og gert markalaust jafntefli við Grindavík, sem eru bæði lið fyrir neðan Gróttu á töflunni. Grótta situr í sjötta sæti deildarinnar með 27 stig og átta stigum frá umspilssæti svo að þeir þurfa sigur í dag til þess að eiga möguleika á umspilinu.

Heimamenn hafa átt góðu gengi að fagna í sumar. Þeir sitja á toppi deildarinnar með 39 stig, tveimur stigum á undan Þrótti og Fylki, eiga leik inni og eru komnir í bikarúrslit.


Með sigri í dag kemst Afturelding í 5 stiga forystu í deildinni þegar tveir leikir verða óspilaðir. Afturelding er líka í góðum málum hvað markatöluna varðar, hún er 11 mörkum betri en markatala Þróttar sem eru þeim næstir.

Liðið er taplaust í síðustu fjórum leikjum með tveimur sigrum og tveimur jafnteflum. Mosfellingar sóttu 7-0 sigur til Þorlákshafnar í síðustu umferð gegn föllnum Ægismönnum.

Twana Khalid Ahmed verður með flautuna í kvöld og honum til aðstoðar verða þeir Þráinn Jón Elmarsson og Sveinn Ingi Sigurjónsson Waage. Dómaraeftirlitsmaður kvöldsins verður Sigurður Hannesson.

Leikurinn hér í kvöld er lokaleikur 15. umferðar Lengjudeildarinnar en vegna undanúrslita Mjólkurbikarsins, þar sem Afturelding sigraði Fylki og komst þar af leiðandi í úrslit, var leiknum frestað. Liðin hafa því lengi átt leik inni.

Góða kvöldið og verið velkomin í þessa þráðbeinu textalýsingu á leik Aftureldingar og Gróttu í Lengjudeildinni frá Malbiksstöðinni að Varmá.