Ítalinn flautar til leiksloka. Íslendingar komu sterkir inn í seinni hálfleikinn og jöfnuðu leikinn. Sanngjörn niðurstaða.

912 áhorfendur í dag.

Þrjár mínútur í uppbót.

Frakkland fær horn. Boltinn kemur inn á teiginn en það er skallað frá.

Daníel Tristan keyrir inn á teiginn og tekur skotið en það fer hátt yfir markið.

Mayulu kemur með baneitraða fyrirgjöf frá vinstri sem ratar beint á kollinn á Tel. Skallinn fer framhjá markinu.

Galdur kemst upp að endamörkum og vinnur horn. Boltinn kemur inn á teiginn og Viktor Bjarki er einn á auðum sjó, hann nær skalla en Jaouen ver vel.

Viktor gerir vel og vinnur aukaspyrnu.

Galdur finnur Stíg inni á teignum en hann skýtur yfir markið af stuttu færi. Þarna verður Stígur að gera betur.

Galdur með fína fyrirgjöf frá hægri sem ratar beint á pönnuna á Viktori Bjarka, hann nær ekki nógu miklum krafti í skallann.

Stígur Diljan er að gera sig kláran ásamt Galdri.

Mayulu reynir skot fyrir utan teig. Skotið á viðkomu í varnarmann Íslands og hornspyrna niðurstaðan. Boltinn flýgur yfir allan pakkann og í markspyrnu.

Löng sókn Íslands endar með því að Eggert finnur Daníel Tristan inni á teignum. Hann nær skoti á lofti en boltinn fer hátt yfir markið.

Frakkland fær horn. Þeir taka þetta stutt og halda í boltann fyrir utan vítateig Íslands.

Ísland fær aukaspyrnu á stórhættulegum stað.

Frakkar fá horn. Boltinn kemur inn á teiginn en Ísland hreinsa frá.

Eggert Aron skiptir boltanum frá vinstri til hægri. Helgi Fróði kemst á vinstri fótinn en skotið er rétt framhjá.

Ísland fá aukaspyrnu á fínum stað. Boltinn kemur inn á teiginn en sendingin er slök og Frakkar hreinsa í innkast.

Daníel Tristan sparkar þessu í gang á ný.

Ítalinn flautar til hálfleiks. Frakkar hafa verið sterkari aðilinn í þessum leik. Ísland hafa átt erfitt með að komast í boltann og hafa ekki skapað góð færi. Það er mikill kraftur í Frökkum og þeir hafa skapað fullt af góðum færum.

Frakkar fá aukaspyrnu á ágætis stað. Þeir taka hana stutt og halda í boltann.

Mathys Tel fær boltann í ágætis stöðu. Hann reynir að lyfta boltanum yfir Lúkas úr þröngu færi en hann blakar boltanum yfir markið. Ísland hreinsa boltann frá úr hornspyrnunni. Í kjölfarið fær Zeze boltann, hann reynir að lauma honum í fjærhornið en boltinn fer rétt framhjá stönginni.

Daníel Tristan fær boltann við vítapunktinn. Hann er við það að hleypa af en Frakkar koma boltanum burt.

Bahoya reynir langan bolta í gegn sem er ætlaður Tel, hann missir af boltanum og Lúkas handsamar boltann.

Eggert Aron fær boltann fyrir utan teig. Hann lætur vaða en Jaouen grípur boltann.

Mayulu sér hlaup Bahoya og kemur með magnaða sendingu á hann. Bahoya kemst enn og aftur upp að endamörkum. Hann nær hættulegri fyrirgjöf sem Júlíus Mar nær að hreinsa frá.

Amin vinnur horn. Boltinn kemur inn á teiginn en Zeze skallar frá. Frakkland fær aukaspyrnu í kjölfarið.

Lúkas er að leika sér að eldinum. Sending til baka á Lúkas en fyrsta snertingin hans er skelfileg og Tel kemst næstum því í boltann. Lúkas nær að lokum að halda í boltann.

Bahoya er að byrja þennan leik af miklum krafti. Hann kemst upp að endamörkum og leggur boltann út í teiginn en sendingin ratar ekki á samherja.

Mathys Tel reynir skot á lofti en það er afar kraftlítið. Lúkas er klaufi í markinu og missir boltann í horn. Ekkert verður úr hornspyrnunni.

Bahoya brunar upp vinstri kantinn og kemur með fyrirgjöf, en þarna vantar hvítar treyjur og sóknin rennur út í sandinn.

Mayulu kemst framhjá Tómasi Orra. Hann kemst upp að endamörkum og leggur boltann út í teiginn en Ísland ná að bægja hættunni frá.

Fyrstu fimm mínúturnar hafa verið mjög rólegar. Frakkar eru að halda vel í boltann í öftustu línu.

Frakkar sparka þessu í gang.

Það eru fimm mínútur í leik og byrjunarliðin ganga út á völl. Það er góð mæting á leikinn og frábærar aðstæður.

Logi Hrafn Róbertsson, Gísli Gottskálk Þórðarson og Róbert Frosti Þorkelsson eru meiddir og því ekki með, Ágúst Orri Þorsteinsson gaf ekki kost á sér, Kjartan Már er utan hóps og Nóel Atli Arnórsson byrjar á bekknum. Inn koma þeir Amin Cosic, Helgi Fróði Ingason, Eggert Aron Guðmundsson, Tómas Orri Róbertsson, Júlíus Mar Júlíusson og Davíð Helgi Aronsson.

Landsliðið þurfti að taka æfingu í Egilshöll vegna veðurs.

„Það hefur mikið gengið á í sumar og það er eins og það er. Ég er bara áfram í Malmö, það eru spennandi tímar fram undan,“ segir Daníel Tristan Guðjohnsen.

Viktor Bjarki Daðason, leikmaður FCK, ræddi við fótbolta.net fyrir æfingu liðsins.

„Nei og já, auðvitað vill maður vera í A-landsliðinu eftir tímabil þar sem maður stóð sig vel. En maður er að koma til baka eftir erfið meiðsli. Ég er mjög glaður og mæti í þennan glugga með kassann úti, geri mitt besta. Þetta eru geggjaðir leikir og vonandi komumst við á EM,“ segir Viktor.

Yoro átti upprunalega að vera í hópnum sem mætir Íslandi. Þetta er í fyrsta sinn sem hann fær kallið í A-landslið Frakklands. Hann kemur inn í stað Ibrahima Konate, miðvörð Real Madrid, sem er að glíma við hnémeiðsli.

Það kom upp bilun í flugvél Frakka og þeir eru ekki komnir til landsins. Þeir áttu að taka eina æfingu hér á landi en æfa í staðinn í Frakklandi.

Liðin mættust síðast í Frakklandi í lok mars. Frakkar höfðu betur og sigruðu 2-1. Noé Lebreton kom Frakklandi yfir eftir tíu mínútna leik en Daníel Tristan Guðjohnsen jafnaði metin með vítaspyrnu eftir 24 mínútur. Nathan Zézé, miðvörður Frakklands, skoraði sigurmarkið fimm mínútum síðar og þar við sat.

Luca Zufferli, sem dæmdi leik hjá Juventus síðasta sunnudag, er aðaldómari í dag. Hann kemur frá Ítalíu.

Honum til aðstoðar eru Giuseppe Perrotti og Khaled Bahri. Fjórði dómari er Daniele Perenzoni.

Frakkar hafa farið gríðarlega vel af stað í undankeppninni og eru ósigraðir eftir sex leiki. Þeir sitja á toppi riðilsins með 16 stig og markatöluna 21–4.

Ísland hefur leikið sjö leiki í undankeppninni til þessa og er í 3. sæti riðilsins með 11 stig. Liði á þrjá leiki eftir og er því enn í baráttunni um sæti á EM 2027. Fyrri leikur liðanna fór 2-1 fyrir Frakklandi.

Heil og sæl kæru lesendur og verið velkomin í beina textalýsingu frá Pepsi vellinum í Laugardal.

Klukkan 15:00 taka Ísland á móti Frakklandi í undankeppni EM U21-landsliða. Ísland eru í 3. sæti með 11 stig en Frakkland er efst í riðlinum með 16 stig.