SKÝRSLAN: Klárað með glæsibrag eftir brösótta byrjun
Hvað réði úrslitum?
Íslenska liðið var einfaldlega betra á öllum sviðum leiksins. Færeyjar höfðu að engu að keppa og það sást á spilamennskunni. Sigurinn var aldrei í hættu en það er þó hreinlega ótrúlegt að mörkin hafi ekki orðið fleiri. Menn stigu aðeins af bensíngjöfinni í seinni hálfleik. En þessi gluggi hjá Íslandi var framúrskarandi! Gleymum því ekki að íslenska liðið hóf þessa keppni á því að tapa heima fyrir Færeyjum og gera jafntefli gegn Eistlandi.
Bestu leikmenn
1. Amin Cosic
Var algjörlega baneitraður á þeim köflum þar sem íslenska liðið lék sem best. Geislar af sjálfstrausti, hefur tekið miklum framförum á skömmum tíma og mun vonandi halda áfram á þeirri beinu braut í búningi Íslands.
2. Daníel Freyr Kristjánsson
Það er hægt að henda ýmsum nöfnum í þennan dálk en mér finnst að Daníel Freyr eigi hrós skilið fyrir ljómandi flottan leik.
Atvikið
Daníel Tristan Guðjohnsen hefur verið óstöðvandi í þessum glugga og þegar hann kom Íslandi tveimur mörkum yfir þá hugsaði maður 'Hvað mun þetta enda í mörgum mörkum í kvöld?'
Hvað þýða úrslitin?
Ísland endar í öðru sæti riðilsins með 18 stig. Dregið verður í umspilið á föstudag en leikirnir fara fram í næsta mánuði. Sigurvegarinn úr því einvígi (leikið heima og að heiman) fer á EM U21 landsliða í Albaníu og Serbíu á næsta ári.
Vondur dagur
Fyrir kvöldið átti Sviss möguleika á því að ná öðru sætinu og komast í umspilið. Svisslendingar fengu 7-1 útreið gegn Frakklandi eftir að hafa tapaði 5-1 fyrir Íslandi á dögunum. Samtals 12-2 í síðustu tveimur leikjum. Alvöru magalending hjá Sviss í lok riðilsins en liðið hefði farið áfram með því að sigra Frakka í kvöld.
Dómarinn - 9
Það vantaði ekkert malt í manninn með flautuna.