Gríðarlega svekkjandi jafntefli staðreynd eftir magnaðar lokamínútur. Ísland var töluvert sterkari aðilinn í dag en það nægði ekki. 1-1 er niðustaðan og hreinn úrslitaleikur framundan í Grikklandi.

Viðtöl og umfjallanir detta inn seinna í dag, ég þakka fyrir mig.

Hilmir Rafn með lélegt skot beint á Botis í markinu.

Grikkir sækja hratt og senda fyrir markið. Hlynur Þórhalls kemst í boltann með einhverri sporðdrekatæklingu og bjargar.

Hættulegur bolti frá Daníel en Grikki skallar frá. Mjög mikilvægur skalli því fyrir aftan hann voru tveir bláklæddir.

Ágúst Orri keyrir upp kantinn en það er ýtt við honum og aukaspyrna dæmd.

Hættuleg Grísk sókn sem endar með lúmsku skoti Almyras. Lúkas hendir sér niður og ver vel.

Daníel Tristan vinnur hornspyrnu.

Botis grípur þægilega frá Daníel Frey.

Línurnar orðnar grænar og leikurinn kominn í gang aftur.

Frábær hornspyrna frá Daníel Frey á fjær. Davíð Helgi rífur sig lausan og hann verður að gera betur. Boltinn í hliðarnetið af mjög stuttu færi.

Flott samspil Freys og Hlyns sem vinnur enn eina hornspyrnuna.

Hættulegur bolti inn í teiginn úr hornspyrnu Íslands en enginn kemst í boltann sem fer í gegnum allan pakkann.

Christos Alexiou tekur Ágúst Orra klaufalega niður við vítateigslínuna og Belginn bendir á punktinn.

Daníel Tristan yfir boltanum.

Hlynur finnur Ágúst Orra í hlaupinu sem sendir svo stórhættulegan bolta fyrir markið. Snjórinn hefur eitthvað ruglað Viktor Bjarka sem skóflar boltanum framhjá markinu. Stórhættulegt færi engu að síður.

Monastirlis liggur eftir og markmannsskipting líklega á leiðinni.

Hnitmiðuð tækling hjá Hlyni Þórhalls á Papakanellos sem var í ágætri stöðu. Boltinn af grikkanum og út í íslenskt innkast.

Sending inn fyrir á Koutsias en hann er ekki nógu snöggur. Júlíus og Davíð ná að trufla hann og hann nær ekki nema slöku skoti á markið.

Seinni hálfleikur hefur farið rólega af stað. Liðin að læra upp á nýtt á nýskafaðan völl.

Ísland kemur seinni hálfleik af stað.

Skot
Ísland 5-3 Grikkland
Hornspyrnur
Ísland 4-2 Grikkland
Gul spjöld
Ísland 0-2 Grikkland

Belginn flautar til hálfleiks hér. Markalaus fyrri hálfleikur að baki en bæði lið hafa fengið sín færi. Galdur Guðmundsson átti hættulegasta færi leiksins en skotið í slánna. Tökum okkur korter.

Galdur vinnur aukaspyrnu við hornfánann.

Daníel Freyr yfir boltanum en Grikkir koma boltanum út úr teignum. En þar er Galdur sem tekur skotið í fyrsta en skotið framhjá markinu.

Ísland fær aukaspyrnu í fyrirgjafastöðu. Daníel Freyr yfir boltanum en fyrirgjöfin beint í fangið á Monastirlis sem grípur hann þægilega. Daníel setti ekki nægilegan snúning á boltann.

Galdur kemur honum á Frey inn í teignum en Grikkirnir lesa hann og hefja sókn. Snjórinn þvælist eitthvað fyrir Kontouris sem var kominn í hættulega stöðu og Ísland vinnur boltann aftur.

Hornspyrna hinum megin frá en spyrna Galdurs yfir allan pakkann.

Lúkas hugrakkur og kemur út á móti Kostoulas og er á undan í boltann. Sóknin heldur samt áfram og endar með skoti frá Almyras sem Lúkas ver vel í horn.

Grikkir ná ekki að skapa hættu úr horninu.

Galdur lyftir boltanum út úr teignum þar sem Daníel Tristan tekur hann á lofti. Honum tekst að halda boltanum niðri en skotið framhjá markinu. Íslendingar eru líklegri þessa stundina.

Davíð Helgi með frábæra sendingu, sem leit fyrst út fyrir að vera hreinsun, á Viktor Bjarka. Viktor kemur honum á Ágúst sem flækist um sjálfan sig inn í teignum og Grikkir ná valdi á boltanum.

Hættuleg sókn.

Viktor Bjarki gerir vel og vinnur hornspyrnu.

Galdur með hornspyrnuna á Daníel Tristan inn í teignum en tilraunin veik og markspyrna er niðurstaðan.

Þetta tók ekki langan tíma. Vítateigslínurnar eru orðnar grænar aftur.

Belgarnir stöðva leikinn og völlurinn verður skafaður.

Fyrirgjöf inn í teiginn á Kostolous sem enginn setti pressu á en skallinn framhjá markinu.

Galdur fær boltann og keyrir inn á teiginn. Hann vippar svo boltanum og kemst framhjá tveimur áður en hann hamrar boltanum en boltinn smellur í slánni.

Monastirlis hreyfði sig ekki. Þarna munaði litlu.

Freyr með frábæra sendingu inn á Ágúst sem var aðeins of lengi að athafna sig og Grikkir komast í boltann.

Grikkir keyra upp vinstri kantinn og sendingin út í teiginn. Þar lúrir Pnevmonidis en skotið í íslensku vörnina.

Besta færi Grikkja hingað til.

Daníel Freyr með stórhættulegan bolta sem Monastirlis á í erfiðleikum með. Grikkir ná að hreinsa í horn, hinum megin frá. Úr því nær Viktor Bjarki skallinn yfir markið.

Freyr gerir mjög vel og Ísland kemst í álitlega sókn. Grikkir komast í boltann og hreinsa í horn...

Galdur kominn í góða stöðu en belginn dæmir brot í aðdragandanum.

Kostoulas með hættulegan bolta inn á Pnevmonidis en Lúkas er fyrri til og kemur boltanum frá.

Grkkir koma þessu af stað.

Áfram Ísland!

Ísland bláklæddir að vana en Grikkir eru hvítklæddir. Ekki hentugasti liturinn í þessum aðstæðum, það gæti orðið erfitt að sjá þá.

Liðin gengin inn á og þjóðsöngvarnir eru framundan. Mokstur hófst klukkan 11 en ég sé ennþá meira í hvítt heldur en grænt. Þetta verður áhugavert.

Að fá Grikkland í umspilinu var ekki draumadrátturinn. Grikkirnir voru jafnir að stigum við Þjóðverja, með 27 stig, sem tryggðu sér á EM á markatölu.

En veðbækurnar eru óvissar en samkvæmt þeim gæti leikurinn farið á hvorn veginn sem er, þó að Grikkirnir séu taldir aðeins líklegri.

Eftir nær fullkomnan landsliðsglugga í lok september/byrjun október tryggði Ísland sér 2. sæti riðilsins á lokadegi gluggans. Glugginn hófst á sterku 1-1 jafntefli gegn Frakklandi á heimavelli áður en Svisslendingar komu í heimsókn. Sá leikur fór 5-1 Íslandi í vil.

Þá þurfti Ísland að vinna Færeyjar í lokaleiknum og að treysta á að Frakkar tækju stig af Sviss til þess að komast upp fyrir þá. Ísland vann 2-0 sigur í Þórshöfn á meðan Frakkar unnu stórsigur á Sviss, 7-1. Þannig var umspilið tryggt.

Dómarar leiksins koma allir frá Belgíu. Nathan Verboomen verður með flautuna, Mathias Hillaert og Maarten Toeback verða með flöggin og Wesli De Cremer verður á milli varamannaskýlanna.

Flautað verður til leiks á Pepsi-vellinum klukkan 13:00. Flóðljós vallarins uppfylla ekki kröfur UEFA og þess vegna verður flautað til leiks þegar sólin er u.þ.b. hæst á lofti. Vegna þessa óvenjulega leiktíma verður ókeypis á völlinn í boði bakhjarla KSÍ.

Góðan dag kæru lesendur og verið hjartanlega velkomin í þessa þráðbeinu textalýsingu úr Laugardal þar sem Ísland tekur á móti Grikklandi í gríðarlega mikilvægum leik. Þetta er fyrri leikur liðanna í umspili um laust sæti á EM, sem haldið verður í Albaníu og Serbíu næsta sumar.