Kemst Leicester aftur á beinu brautina eftir erfiðar vikur?

Í dag, á öðrum degi páska, fer fram heil umferð í ensku Championship-deildinni, og mjög spennandi leikir framundan.

Leicester og Norwich eiga fyrsta leikinn en Leicester hefur vegnað illa að undanförnu og er skyndilega komið niður í þriðja sæti. Norwich er í sjötta sæti og berst um að komast í umspilið.

Leicester var að stinga af í deildinni um tíma en tapaði öðrum leik sínum í röð á föstudaginn langa þegar liðið beið lægri hlut fyrir Bristol City 1-0. Sóknarmaðurinn reynslumikli Jamie Vardy fór illa með góð færi hjá Leicester í þeim leik.

Þetta var fimmta tap Leicester í átta síðustu leikjum í öllum keppnum og er liðið nú í þriðja sæti á eftir Ipswich sem er á toppnum og Leeds sem er í öðru sæti.

En þrátt fyrir erfitt gengi að undanförnu á Leicester leik til góða á liðin fyrir ofan og enn með örlögin í sínum höndum.