Nicolas Pepe var á bekknum í 2-2 jafntefli Arsenal gegn Norwich í gær. Daily Mail segir að Freddie Ljungberg, bráðabirgðastjóri Arsenal, hafi ekki verið sáttur við það sem hann sá frá Pepe í æfingavikunni.

Arsenal batt miklar vonir við Pepe eftir að hafa borgað 72 milljónir punda fyrir þennan snögga vængmann þegar hann var keyptur frá Lille.

„Nicolas Pepe er virkilega öflugur leikmaður en ég reyni að fara eftir því sem ég sé á æfingasvæðinu. Ég fylgist með þeirri vinnu sem er framkvæmd á hverjum degi og þannig dæmi ég," segir Ljungberg.

Svíinn lokar þó engum dyrum og segir að Pepe fái tækifæri, eins og allir aðrir, til að sýna hvað hann geti fært liðinu.

Arsenal hefur ekki unnið leik í ensku úrvalsdeildinni síðan snemma í október, 1-0 gegn Bournemouth. Liðið mætir Brighton á fimmtudaginn.

Tweet

Senda a Facebook Hafdu samband Senda frétt Prenta frétt Frétta leit