Guðlaugur Victor Pálsson skrifaði undir samning hjá Plymouth Argyle á dögunum.

Mynd: Plymouth Argyle

Guðlaugur Victor Pálsson skrifaði gekk í raðir Plymouth Argyle á dögunum en hann er ekki eini Íslendingurinn sem hefur spilað með ‚The Pilgrims‘ eins og þeir eru kallaðir. Bjarni Guðjónsson lék með þeim á árunum 2004 til 2005 og Kári Árnason lék 75 leiki með Plymouth á árunum 2009 til 2011.

   27.07.24 10:45

Feginn og ótrúlega spenntur - „Mjög jákvætt að Rooney vildi taka mig til sín"

Kári hefur farið fögrum orðum um félagið við Guðlaug Victor sem talar um Kára eins og stóra bróðir sinn.

„Ég þekki Bjarna (Guðjóns) minna en Kára. Ég og Kári, hann er eins og stóri bróðir minn, við erum mjög nánir. Við spiluðum saman í Danmörku (fyrir Aarhus). Ég var bara 16 ára og hann var 25 ára á þeim tíma, hann tók mig bara undir sinn væng.“ sagði Guðlaugur Victor í samtali við Plymouth Live.

Guðaugur segir að Kári hafi gefið honum mörg góð ráð fyrir lífið í Plymouth.

„Hann hefur sagt við mig hvar ég eigi að búa og hitt og þetta. Hann talar mjög vel um staðinn en hann elskaði lífið hérna. Hann er búinn að gefa mér mjög góð ráð.“

Hann segist vera vanur því að spila margar stöður en spili þó aðalega í hægri bakverði með íslenska landsliðinu.

„Ég er vanur því að spila margar stöur, ég geri það oft fyrir landsliðið, hægri bakverði, hafsent eða djúpur á miðju. Ég hef aðalega spilað í hafsent undanfarið en með landsliðinu hef ég aðalega spilað í hægri bakverði. Það er öðruvísi sóknarlega sem varnarlega hjá Rooney með leikstílinn og þess háttar. Ég held að það henti mér vel og ég er spenntur.“

Guðlaugur Victor sagði í samtali við fótbolta.net eftir að hafa skrifað undir hjá Plymouth að hann sé spenntur að spila í Championship deildinni.

„Ég átti góð samtöl við menn hjá félaginu og fékk góðar útskýringar á því hvaða uppbygging er í gangi. Fyrir um áratug síðan varð félagið gjaldþrota og það var mikið hark í einhver ár. Þeir fóru upp úr League Two árið 2020 og League One 2023. Mér líst vel á fólkið sem er að stjórna klúbbnum og það hjálpar auðvitað til að maður þekkir þjálfarann og aðstoðarþjálfarann. Mér líst vel á verkefnið sem er í gangi."

„Fyrir mig að geta fengið tækifæri á að spila í svona öflugri deild, á þessum aldri, er ótrúlega spennandi." sagði Guðlaugur Victor við fótbolta.net eftir að hafa skrifað undir samning við Plymouth Argyle.

Plymouth fór upp úr League Two í Leagur One árið 2020 og upp í Championship deildina árið 2023. Eftir að hafa verið í fallbaráttu allt seinasta tímabil og misst sinn besta leikmann, Finn Azaz, á miðju tímabili í Middlesbrough héldu þeir sér uppi og taka slaginn á ný í Championship deildinni undir stjórn Wayne Rooney.

Fyrsti leikur Plymouth í Championship á árinu er gegn Sheffield Wednesday næsta sunnudag á Hillsborough.