Guardiola: Þeir voru betri en við

Spænsku þjálfararnir Pep Guardiola og Andoni Iraola tókust þar á og hafði Iraola betur þar sem Bournemouth skóp sögulegan sigur gegn ríkjandi Englandsmeisturum eftir að hafa lagt Arsenal að velli í síðasta heimaleik fyrir þennan.

Bournemouth komst í tveggja marka forystu og vann að lokum 2-1 gegn Erling Haaland og félögum.

„Þeir voru betri en við í dag og við réðum ekki við þá. Við vissum að þetta yrði erfiður leikur. Þetta var opið og skemmtilegt en að lokum þá tókst okkur ekki að jafna þrátt fyrir góð færi. Ég vil óska Bournemouth til hamingju með þennan sigur," sagði Guardiola að leikslokum.

Þetta er afar svekkjandi tap fyrir Man City sem er núna í öðru sæti úrvalsdeildarinnar, tveimur stigum á eftir Liverpool. Bournemouth er í efri hlutanum.

Þetta var fyrsti tapleikur Man City í ensku úrvalsdeildinni síðan í desember í fyrra.