Spánn: Athletic Bilbao fór illa með færin

Athletic Bilbao var með mikla yfirburði gegn Betis í kvöld. Liðið óð í færum fyrsta stundafjórðunginn og þar voru bræðurnir Nico og Inaki Williams í aðalhlutverki en þeim tókst ekki að setja boltann í netið. Það var markalaust í hálfleik.

Betis hafði tapað níu af síðustu tíu leikjum á útivelli gegn Bilbao og það leit út fyrir að enn einn tapleikurinn væri í uppsiglingu.

Þeim tókst hins vegar að komast yfir þegar Pablo Fornals fékk boltann inn á teignum og skoraði snemma í seinni hálfleik.

Alex Berenguer kom inn á sem varamaður og hann var ekki búinn að vera lengi inn á þegar hann skallaði boltann í netið og jafnaði metin fyrir Bilbao og tryggði liðinu stig.