Spánn: Real Madrid tók Getafe í kennslustund

Heimamenn voru betri í fyrri hálfleik en eina markið kom eftir aukaspyrnu. Markvörðurinn David Soria hljóp út í fyrirgjöfina, rakst í menn í teignum og endaði á að fá boltann í sig. Þaðan lak knötturinn í netið.

Seinni hálfleikurinn var jafnari þar sem gestirnir frá Madríd fengu betri færi og tvöfaldaði varnarjaxlinn Raphael Varane forystuna með skalla eftir aukaspyrnu Toni Kroos.

Luka Modric gerði svo endanlega út um leikinn í uppbótartíma þegar hann skoraði eftir skyndisókn. Federico Valverde var einn á móti markmanni en ákvað að leggja boltann frekar til Modric sem skoraði auðveldlega.

Real er með eins stigs forystu á Barcelona í toppbaráttunni en Börsungar eiga nágrannaslag við Espanyol í kvöld. Þetta var annar tapleikur Getafe í röð og er liðið í sjöunda sæti, tveimur stigum frá Meistaradeildinni.

Leikmenn Getafe geta kvartað sárann undan öllum þeim marktækifærum sem fóru forgörðum í dag.

Getafe 0 - 3 Real Madrid
0-1 David Soria ('34, sjálfsmark)
0-2 Raphael Varane ('53)
0-3 Luka Modric ('96)

Valencia hafði þá betur gegn Eibar í fyrri leik dagsins. Maximiliano Gomez gerði eina mark leiksins í fyrri hálfleik, þegar hann skallaði fyrirgjöf Daniel Wass í netið.

Leikurinn var leiðinlegur og skoruðu heimamenn úr eina marktækifæri sínu sem rataði á rammann.

Gestirnir reyndu að jafna en það tókst ekki og er Valencia í sjötta sæti eftir sigurinn, einu stigi frá Meistaradeild. Eibar er fimm stigum fyrir ofan fallsvæðið.

Valencia 1 - 0 Eibar
1-0 Maximiliano Gomez ('27)
Rautt spjald: Paulo Oliveira, Eibar ('91)