Tveir leikir hefjast klukkan 18:00. Fulham, sem er í harðri fallbaráttu, tekur á móti Tottenham og getur með sigri þar jafnað Newcastle að stigum í 17. sæti. Tottenham er um miðja deild en liðið vann sannfærandi sigur á Burnley um síðustu helgi þar sem Gareth Bale fór á kostum.

West Brom og Everton eigast einnig við á sama tíma. West Brom er í 19. sæti, sex stigum á eftir Fulham og þarf nauðsynlega á sigri að halda í dag. Gylfi Þór Sigurðsson og félagar í Everton eru í baráttu um Evrópusæti.

Síðasti leikur dagsins byrjar svo klukkan 20:15 og er það stórleikur vikunnar þar sem ríkjandi Englandsmeistarar Liverpool mæta Chelsea. Bæði þessi lið eru í Meistaradeildarbaráttu. Chelsea er í fimmta sæti, einu stigi frá fjórða sætinu, og Liverpool er í sjötta sæti, einu stigi á eftir Chelsea.

Leikirnir verða sýndir í beinni útsendingu á Síminn Sport.

fimmtudagur 4. mars
18:00 Fulham - Tottenham
18:00 West Brom - Everton
20:15 Liverpool - Chelsea