England: Norwich svo gott sem fallið

Norwich er í mjög svo slæmri stöðu á botni ensku úrvalsdeildarinnar eftir 0-1 tap gegn Brighton á heimavelli í dag.

Eina mark leiksins skoraði Leandro Trossard eftir góðan undirbúning Aaron Mooy úti hægra megin. Báðir komu þeir inn í lið Brighton fyrir þennan leik eftir að hvorugur byrjaði gegn Manchester United í miðri viku. Adam Idah komst næst því að jafna leikinn undir lokin en boltinn fór í stöngina.

Fimm leiki hefur Norwich til að vinna upp sjö stiga mun á fjórða neðsta sætið í deildinni. Næstu fjögur liðin fyrir ofan Norwich eiga fimm leiki eftir. Norwich hefur ekkert getað eftir Covid-hlé og ekkert útlit á að breyting verði á því.