Sextánda umferðin í Serie A deildinni á Ítalíu hófst í dag en þá mætti efsta lið deildarinnar, AC Milan, því neðsta, Salernitana.

Milan er í harðri baráttu við Napoli og Inter Milan í toppbaráttunni og var því sigurinn í dag formsatriði gegn neðsta liði deildarinnar sem er einungis með átta stig.

Miðjumaðurinn öflugi Franck Kessie kom Milan yfir strax á fimmtu mínútu og það var síðan Alexis Saelemaekers sem tvöfaldaði forystuna á 18. mínútu.

Meira var ekki skorað á San Siro vellinum í dag og því þægilegur sigur hjá Milan í höfn. Liðið er nú með tveimur stigum meira en Napoli en Napoli á leik í kvöld gegn Atalanta og getur endurheimt toppsætið.