Byrjunarlið Íslands: Andri Lucas byrjar - Albert áfram á bekknum

Ísland mætir Albaníu á Laugardalsvelli klukkan 18:45 í kvöld. Um annan leik Íslands í Þjóðadeildinni er að ræða. Ísland er með eitt stig eftir jafntefli gegn Ísrael en Albanía er að spila sinn fyrsta leik.

Byrjunarliðið hefur verið opinberað og eru þrjár breytingar á liðinu frá síðasta leik. Davíð Kristján Ólafsson kemur inn fyrir Brynjar Inga Bjarnason, Andri Lucas Guðjohnsen kemur inn fyrir bróður sinn Svein Aron og Ísak Bergmann Jóhannesson kemur inn fyrir liðsfélaga sinn hjá FCK, Hákon Arnar Haraldsson. Albert Guðmundsson er á bekknum líkt og í síðasta leik.