Þýskaland: Þrjú mörk á átján mínútum í magnaðri endurkomu Stuttgart

Stuttgart vann magnaðan 3-2 endurkomusigur á Union Berlín í þýsku deildinni í kvöld en öll þrjú mörk Stuttgart komu á átján mínútna kafla í síðari hálfleik.

Danilho Doekhi kom Union-mönnum yfir á 37. mínútu með skalla sem Alexander Nubel varði í slá og inn. Gestirnir tvöfölduðu forystuna strax í byrjun síðari er Robert Skov stangaði boltann í netið eftir fyrirgjöf. Enginn varnarmaður Stuttgart elti Skov inn í teiginn sem 'nikkaði' boltanum í vinstra hornið.

Heimamenn vöknuðu eftir annað markið. Nick Woltemade sá til þess að jafna metin með tveimur mörkum á átta mínútum. Í fyrra markinu fékk hann boltann inn á teig, labbaði framhjá markverði Union og skaut boltanum af krafti í netið.

Annað mark hans kom eftir geggjaða sendingu inn fyrir. Móttakan var frábær hjá Woltemade sem lagði boltann í hægra hornið. Laglega gert hjá turninum.

Woltemade er 22 ára gamall og tæpir tveir metrar á hæð en hann kom til Stuttgart frá Werder Bremen í sumar.

Stuttgart hélt áfram að keyra á Union og kom sigurmarkið þegar tuttugu mínútur voru til leiksloka eftir hræðileg mistök frá markverði Union.

Heimamenn pressuðu hann hátt uppi og í stað þess að flengja boltanum fram völlinn ákvað hann að reyna erfiða sendingu sem rataði á Atakan Karazor sem var ekki í miklum vandræðum með að skora.

Glæsileg endurkoma hjá Stuttgart sem fer upp í 6. sæti deildarinnar með 20 stig en Union í 11. sæti með 16 stig.