Ítalía: Juventus aftur á sigurbraut í deildinni - Vlahovic með stórleik

Það hefur verið bras á Juventus á þessari leiktíð bæði innan sem utanvallar en liðið er í 10. sæti deildarinnar. Liðið vann þó góðan sigur á Salernitana í kvöld.

Juventus hafði ekki unnið í síðustu þremur leikjum í deildinni fyrir leikinn í kvöld en Dusan Vlahovic átti stórleik.

Vlahovic hefur verið að berjast við meiðsli eftir HM en hann hefur komið við sögu í síðustu tveimur leikjum liðsins. Hann var í byrjunarliðinu annan leikinn í röð í kvöld.

Hann skoraði fyrsta mark leiksins úr vítaspyrnu og lagði upp mark á Filip Kostic rétt fyrir lok fyrri hálfleiks.

Hann gerði síðan útum leikinn strax í upphafi síðari hálfleiks með marki og gulltryggði 3-0 sigur liðsins.