Birkir Már Sævarsson.
„Tilfinningin er frekar slæm þegar maður fær mark á sig svona rosalega seint," sagði Birkir Már Sævarsson, bakvörður Vals, eftir 1-1 jafntefli gegn Víkingi í Pepsi Max-deildinni.
Lestu um leikinn: Valur 1 - 1 Víkingur R.
Valur og Víkingur eru áfram tvö efstu liðin, taplaus. Nikolaj Hansen jafnaði metin fyrir Víking í kvöld á síðustu stundu.
„Það lá svolítið í loftinu þetta jöfnunarmark. Þeir voru farnir að ýta okkur til baka og við vorum ekki að nýta möguleika til að refsa þeim í skyndisóknunum. Þeir voru með helvíti hávaxið lið í lokin inn í teig hjá okkur."
„Þetta var bara ekki nógu gott fannst mér... ég held að jafntefli sé nokkuð sanngjarnt. Ég hefði viljað taka þessi þrjú stig og stela þeim," sagði Birkir.
Valsmenn eru á toppnum með 17 stig eftir fyrsta þriðjung. Þeir eiga samt mikið inni að sögn Birkis.
„Mér finnst við eiga alla vega einn gír inni. Við höfum ekki spilað frábærlega þó við séum að vinna þessa leiki."
Hægt er að sjá viðtalið við Birki í heild sinni hér að ofan.
Athugasemdir
