Spánn: Flick sá rautt er Barcelona gerði jafntefli við Betis - Aðeins einn sigur í síðustu fimm leikjum

Frammistaða Börsunga hefur verið upp og niður síðustu vikur en liðið hefur aðeins unnið einn af síðustu fimm deildarleikjum sínum.

Robert Lewandowski, markahæsti maður deildarinnar, kom Barcelona yfir undir lok fyrri hálfleiks en það var sextánda mark hans á tímabilinu.

Á 66. mínútu fengu Betis-menn vítaspyrnu er Frenkie de Jong gerðist brotlegur í teig Börsunga. Hansi Flick, þjálfari Barcelona, ærðist á hliðarlínunni og uppskar rautt spjald, en honum fannst vítaspyrnan ódýr. Í endursýningunni virðist De Jong stíga á hælinn á leikmanni Betis og ákvörðunin líklega rétt hjá dómarateyminu.

Giovani Lo Celso skoraði úr spyrnunni en Barcelona svaraði fjórtán mínútum síðar með marki Ferran Torres.

Tíu mínútum var bætt við venjulegan leiktíma og var það nóg fyrir Betis til að koma til baka. Assane Diao skoraði á fjórðu mínútu uppbótartímans og uppskar stig úr leiknum.

Barcelona er áfram á toppnum með 38 stig, fimm stigum meira en Real Madrid en Betis er í 11. sæti með 21 stig.

Úrslit og markaskorarar:

Las Palmas 2 - 1 Valladolid
1-0 Sandro Ramirez ('20 )
1-1 Marcos Andre ('45 )
2-1 Sandro Ramirez ('64 )

Betis 2 - 2 Barcelona
0-1 Robert Lewandowski ('39 )
1-1 Giovani Lo Celso ('68 , víti)
1-2 Ferran Torres ('82 )
2-2 Assane Diao ('90 )