Lingard: Við þurfum að gera mun betur

West Ham vann Leeds 2-0 á heimavelli og er nú aðeins tveimur stigum frá Chelsea sem situr í fjórða sætinu.

Lingard skoraði fyrra mark West Ham í kvöld en hann klikkaði á vítaspyrnu og náði síðar frákastinu til að skora.

„Við byrjuðum hægt og vorum ekki öruggir með boltann. Við skoruðum mörkin og unnum leikinn en ef við ætlum að ná fjórða sætinu verðum við að gera mun betur," sagði Lingard.

„Markvörðurinn valdi rétt horn og varði en sem betur fer kom boltinn aftur til mín. Þetta var þó ekki nógu gott ef við ætlum að ná topp fjórum."

Declan Rice, fyrirliði West Ham í kvöld, ræddi aðeins við Lingard áður en hann tók vítaspyrnuna.

„Hann spurði mig hvort ég vildi taka vítið og ég sagði já. Það var gott að skora í dag."