Spá Fótbolta.net fyrir Bestu kvenna: 9. sæti

Spáin:
1. ?
2. ?
3. ?
4. ?
5. ?
6. ?
7. ?
8. ?
9. FHL, 19 stig
10. Tindastóll, 16 stig

Um liðið: FHL skrifaði söguna á síðasta tímabili er liðið tryggði sér sæti í Bestu deildinni. Fyrir tímabil var FHL spáð um miðja deild en það var í raun aldrei annað í kortunum en að liðið myndi fljúga upp. Þær unnu tíu leiki í röð eftir að hafa tekið fjögur stig úr fyrstu þremur leikjunum; þegar þær voru búnar að spila sig saman, þá voru þær nánast óstöðvandi. Núna á Austurland fulltrúa í efstu deild - karla eða kvenna - í fyrsta sinn í 30 ár. Það gerðist síðast þegar Höttur átti lið í efstu deild kvenna árið 1994. Þetta er mjög spennandi og verður gaman að sjá FHL spreyta sig í deild þeirra bestu.

Þjálfarinn: Björgvin Karl Gunnarsson hefur stýrt skútunni hjá FHL nánast frá stofnun. Hann tók við liðinu í 2. deild kvenna fyrir sumarið 2019 og undir hans stjórn hefur uppgangurinn verið mikill. Þær fóru úr því að vera á meðal neðstu þriggja í 2. deild í það að komast upp í Bestu deildina á sex tímabilum. Björgvin Karl er heimamaður og þekkir umhverfið vel en hann hefur einnig stýrt kvennaliði KR á sínum þjálfaraferli.

Álit Magga
Magnús Haukur Harðarson, fyrrum þjálfari Fjölnis, er sérfræðingur Fótbolta.net í Bestu deild kvenna. Hann rýnir í öll liðin fyrir tímabilið sem er framundan.
Liðið hafi engu að tapa
„Eftir draumatímabil í Lengjudeildinni í fyrra er FHL komið í Bestu deildina og má segja að liðið hafi engu að tapa þar."

„Styrkleikar liðsins liggja í kjarnanum sem hefur verið þarna lengi og hjá þjálfaranum sem hefur unnið algjört þrekvirki fyrir austan. Emma Hawkins og Sammy Smith sem voru magnaðar í fyrra eru ekki á svæðinu en Björgvin Karl hefur verið klókur í að sækja útlendinga síðustu ár og blanda þeim saman við kjarnann í liðinu."

„Það verður fróðlegt að fylgjast með íslensku stelpunum í liðinu og sjá hvort þær séu tilbúnar í þetta risa verkefni sem framundan er en með hjartað og stemminguna að vopni hef ég fulla trú á kraftaverki í lok tímabilsins. Það er lítið hægt að lesa í undirbúningstímabilið hjá FHL en fyrsti leikurinn í Bestu verður sex stiga leikur á Sauðkróki og það er eins gotta að Austfirðingar fjölmenni á völlinn þar sem og í heimabyggð."

„Til þess að FHL verði áfram í Bestu deildinni 2026 þarf mikið hjarta og stemmingu og liðið þarf að fylgja fyrirliða sínum í einu og öllu."

Lykilmenn: Rósey Björgvinsdóttir og Aida Kardovic
Rósey er fyrirliði FHL og þeirra leiðtogi inn á vellinum. Hún var frábær í varnarleiknum í fyrra og komst í lið ársins eftir sína frammistöðu síðasta sumar. Hún er afar sterkur karakter sem hefur gengið í gegnum margt með liðinu. Kalli, þjálfari liðsins, hefur verið afar sterkur við að sækja erlenda leikmenn síðustu ár og vonandi fyrir liðið verður Aida Kardovic öflug í sumar. Hún er fjölhæfur miðjumaður sem getur líka spilað allar fremstu stöðurnar á vellinum. Aida spilaði í Creighton háskólanum við góðan orðstír auk þess sem hún á sex leiki með U19 landsliði Serbíu.

Gaman að fylgjast með: Björg Gunnlaugsdóttir
Björg er gríðarlega snögg og áræðinn leikmaður sem komst á bekkinn í liði ársins í Lengjudeildinni í fyrra þrátt fyrir að vera bara fædd árið 2006. Hún er á leið inn í sitt sjötta tímabil með meistaraflokki þrátt fyrir ungan aldur en það fyrsta í Bestu deildinni og er hún svo sannarlega leikmaður sem gæti sprungið út í sumar ef hún fær réttu verkfærin til þess. Björg er yngri systir landsliðskonunnar Áslaugar Mundu Gunnlaugsdóttur og hefur verið hluti af yngri landsliðum Íslands.

Komnar:
María Björg Fjölnisdóttir frá Fylki
Hope Santaniello frá Bandaríkjunum
Calliste Brookshire frá Bandaríkjunum
Aida Kardovic frá Bandaríkjunum
Mikaela Nótta Pétursdóttir frá Breiðablki (á láni)
Ólína Helga Sigþórsdóttir frá Völsungi

Farnar:
Emma Hawkins til Portúgals
Deja Sandoval í FH
Samantha Smith til Breiðabliks (var á láni hjá Breiðabliki)
Ásdís Hvönn Jónsdóttir til Svíþjóðar
Kristín Magdalena Barboza í Hauka (á láni frá Breiðabliki)
María Del Mar Mazuecos Ruiz (var á láni)
Selena Salas í Selfoss

Samningslausar
Hafdís Ágústsdóttir (2002)
Alexa Ariel Bolton (2000)
Ársól Eva Birgisdóttir (1998)
Laia Arias Lopez (2000)
Kamilla Björk Ragnarsdóttir (2009)



Fyrstu fimm leikir FHL:
16. apríl, Tindastóll - FHL (Sauðárkróksvöllur)
21. apríl, FHL - Valur (Fjarðabyggðarhöllin)
27. apríl, FH - FHL (Kaplakrikavöllur)
3. maí, Fram - FHL (AVIS völlurinn)
8. maí, FHL - Þór/KA (Fjarðabyggðarhöllin)

Spámennirnir: Alexandra Bía Sumarliðadóttir, Anton Freyr Jónsson, Brynjar Óli Ágústsson, Elíza Gígja Ómarsdóttir, Guðmundur Aðalsteinn Ásgeirsson, Mist Rúnarsdóttir, Stefán Marteinn Ólafsson, Sverrir Örn Einarsson, Sæbjörn Þór Þórbergsson Steinke og Sölvi Haraldsson.