Þýskaland: Hoffenheim í 2. sæti eftir dramatískan sigur

Jhon Cordoba kom Köln yfir gegn Hoffenheim í fyrsta leik helgarinnar í þýska boltanum.

Köln leiddi í leikhlé en Saris Adamyan kom af bekknum og jafnaði í upphafi síðari hálfleiks.

Hoffenheim var betri aðilinn en tókst ekki að gera sigurmarkið fyrr en á 98. mínútu, þegar Jurgen Locadia skoraði úr vítaspyrnu.

Heimamenn í Köln voru afar óheppnir að fá dæmda vítaspyrnu á sig en dómurinn var réttur og dramatískur sigur Hoffenheim staðreynd.

Hoffenheim er komið á fleygiferð eftir slaka byrjun á tímabilinu og var þetta fimmti sigur liðsins í röð í deildinni og sá sjötti í öllum keppnum.

Hoffenheim er í öðru sæti, með 20 stig eftir 11 umferðir. Köln er í næstneðsta sæti með 7 stig.