England: Leicester hafði betur gegn Úlfunum

Leicester City tók á móti Wolves í hörkuslag í ensku úrvalsdeildinni í dag og var Jamie Vardy búinn að skora eftir stundarfjórðung. Hann skoraði af vítapunktinum eftir að hendi hafði verið dæmd á Max Kilman, varnarmann Wolves. Kilman var þó afar óheppinn því hann fékk boltann í höndina af stuttu færi og kom þannig í veg fyrir fyrirgjöf.

Leicester var betra liðið í fyrri hálfleik og komst nálægt því að tvöfalda forystuna þegar Vardy steig aftur á vítapunktinn á 39. mínútu, eftir klaufalegt brot Rayan Ait-Nouri innan vítateigs. Rui Patricio gerði vel að verja frá Vardy og staðan 1-0 í leikhlé.

Síðari hálfleikurinn var fjörugur þar sem bæði lið fengu góð færi til að skora en inn vildi boltinn ekki. Kasper Schmeichel átti stórkostlega markvörslu á lokakaflanum og tókst Úlfunum ekki að jafna.

Leicester fer á topp úrvalsdeildarinnar með sigrinum, þar er liðið með 18 stig eftir 8 umferðir, einu stigi fyrir ofan Tottenham. Wolves er með 13 stig.