UTAN VALLAR: Þór/KA velti 59 milljónum króna á síðasta ári

Í vikunni tilkynnti KA að félagið hefði tekið þá ákvörðun að endurnýja ekki samstarfssamning félagsins við Þór um kvennaliðið Þór/KA. Félögin höfðu leikið saman undir sameiginlegu merki allt frá árinu 1999 og varð í tvígang Íslandsmeistari, árið 2012 og 2017. Félagið endaði í 8. sæti nýafstaðins tímabils í Bestu deild kvenna. KA sagði í tilkynningunni sinni að að baki ákvörðuninni liggur sú framtíðarsýn KA að kvennaknattspyrna verði hornsteinn í starfi félagsins. Framkvæmdastjóri Þórs sagði að ákvörðunin hafi komið honum á óvart. Við þessi tíðindi vakna auðvitað ýmsar spurningar, meðal annars um það hvernig rekstur á kvennaliðum gengur á Íslandi. Hér í þessari grein verður því rýnt í ársreikninga Þór/KA síðustu fimm árin.