Vill ekki sjá Lacey í byrjunarliði Man Utd - „Þetta er ekki rétti tíminn“

United hefur ekki unnið deildarleik síðan í ágúst, en fær tækifæri til að binda enda á þá bið þegar liðið tekur á móti Aston Villa síðar í dag.

United er í fallsæti í fyrsta sinn í 40 ár og hefur verið rætt hvort hinn 19 ára gamli Shea Lacey gæti fengið tækifæri í byrjunarliðinu eftir góða innkomu gegn Roma í vikunni en Neville er hins vegar alfarið á móti því.

„Ég tel að þetta sé ekki rétti tíminn til að spila krökkunum. Núna þarf reynslu. Það er ákveðin örvænting fólgin í því að vera með hæfileikaríka krakka og ákveða að setja þá í byrjunarliðið við þessar aðstæður. Núna þarf hann að stilla upp sínu sterkasta liði og leikmennirnir verða að standa undir væntingum.“

„Það er ótrúlegt að sjá United í fallsæti. Þetta er ákveðin áminning um stöðuna, en það sem við sáum á miðvikudagskvöldið var fyrst og fremst knúið áfram af tilfinningum.“

„United náði að skora þetta mark og á Evrópukvöldum höfum við oft séð hvernig tilfinningarnar og stemningin geta fleytt liðum í gegnum erfið augnablik. Andrúmsloftið verður rafmagnað, en það eitt og sér dugar ekki til að koma þér í gegnum alla erfiðleikana,“ sagði Neville.

Hann segir að það yrði mikið áfall fyrir félagið að fara inn í landsleikjahléið í fallsæti.

„Það þarf góða frammistöðu, skýrt leikmynstur og ákveðna aðferðafræði. Sem leikmaður þarftu stöðugleika og skýran leikstíl sem þú getur treyst á. United hefur verið arfaslakt á þessu tímabili og ef liðið fer inn í landsleikjahléið í fallsæti verður staðan orðin verulega örvæntingarfull,“ sagði Neville í lokin.