Ítalía: Fiorentina á flugi - Kærkominn sigur hjá Kristófer

Fiorentina er á svakalegu skriði um þessar mundir en liðið lagði Cagliari af velli í ítölsku deildinni í dag.

Danilo Cataldi skoraði eina markið þegar fyrri hálfleikur var rúmlega hálfnaður en það gerði hann með góðu skoti í D-boganum. Albert Guðmundsson er að koma til baka eftir meiðsli og hann spilaði frá 67. mínútu.

Þetta var áttundi sigur Fiorentina í röð í deildinni en liðið er í 4. sæti með 31 stig, jafn mörg stig og Inter og stigi á eftir Napoli sem situr í 2. sæti.

Kristófer Jónsson var á bekknum þegar Triestina vann vægast sagt kærkominn sigur í C-deildinni á Ítalíu í dag.

Triestina lagði L.R. Vicenza 2-0. Liðið er í næst neðsta sæti deildarinnar með tíu stig eftir 18 umferðir. Þetta var fyrsti sigur liðsins síðan í fyrstu umferð.