Spánn: Griezmann og Messi sáu um Granada

Gestirnir áttu ekki í vandræðum með Granada í dag og það voru þeir Antoine Griezmann og Lionel Messi sem sáu um mörkin fyrir Börsunga í dag.

Antoine Griezmann kom Barcelona yfir strax á 12. mínútu og hann lagði síðan upp mark á Lionel Messi á þeirri 35 og staðan því 2-0.

Í lok fyrri hálfleiks fékk Barcelona aukaspyrnu. Heimamenn stilltu upp varnarvegg og það var einn leikmaður þeirra sem var liggjandi fyrir bakvið vegginn eins og er í tísku í dag.

Það stoppaði hins vegar ekki Messi. Hann setti boltann undir vegginn, framhjá liggjandi varnarmanninum og í netið. Frábært mark hjá Messi.

Staðan 3-0 í hálfleik og leikurinn í raun búinn. Gestirnir bættu við einu marki í síðari hálfleik og það var Griezmann sem gerði það, tvenna hjá honum í dag eins og hjá Messi.

Með sigrinum fer Barcelona upp í þriðja sætið en Granada er í því sjöunda.