Þýskaland: Malen og Füllkrug sáu um Freiburg

Borussia Dortmund vann öruggan 3-0 sigur á Freiburg á Signal Iduna Park í þýsku deildinni í kvöld.

Miklar tafir voru í leiknum í kvöld. Stuðningsmenn köstuðu tennisboltum inn á völlinn til að mótmæla því að einkaaðilar geti fjárfest í tveimur efstu deildunum í Þýskalandi. Tafirnar reyndust Dortmund vel.

Donyell Malen og Niclas Füllkrug voru eitraðir saman í fremstu víglínu.

Malen skoraði fyrsta mark Dortmund eftir undirbúning Füllkrug á 16. mínútu og var uppskriftin svipuð í öðru markinu, sem kom undir lok fyrri hálfleiks.

Þegar þrjár mínútur voru eftir af leiknum skoraði síðan Füllkrug þriðja markið eftir stoðsendingu Ian Maatsen, sem er á láni frá Chelsea.

Dortmund er í 4. sæti með 40 stig á meðan Freiburg er í 7. sæti með 28 stig og var að tapa þriðja deildarleik sínum í röð.